Nghilh lohna Par

June 15th, 2009 10:47 pm
LINK misual

Sam ang then ni te hi,
Lo herchhuak leh thin e,
Ami leng tawnah hian
Tuar dan hril thiam awm maw?
Duhlai leng zing zin tur
Hnahnem hling par an hlan,
Nghilhloh nan ser ang chang thei tak maw?

Nghilhloh ngaihhrui thu di
Thlun nan lo par chhuak e
Inthen ni lo her chang lunglen damte’n thawi nan
Vangkhaw sira se-dai theuva pal kara’n
Thliahlai nghakin a lo par pawl riai.

He hla hi Pahlira Sena Chawngthu phuah a ni a. A phuah chhan hi a sawichhuak lo na in, rinthu in kan thianhovin kan bawl phuan trhina. Nuam kan tiin kan lungleng lutuk hi kan mittui te a tla deuh ti-tih thei nia. Hmanlai kan nu leh pa te hunah khan sipai tan an intih-hmuh hle a. Sipai kal tur hi chuan am takin an bialnu te an rim thin. An chhutri lo hawng kal leh tur phei chu an lungleng zual viau zel. Sipai bansan phah pawh sawi tur an tam.

Chutia sipai tang tur chu an bialnu ten an lo hawng leh ngei ang em tih hi, beisei si beisei lo ang reng bawk siin, in ngaihhrui emaw in theihngilh loh nan emaw, an zin dawn kar-ah, kawldai hling ngei mai hian an han inchhun thin an ti. Kawldai hling chhun hi “a ser duh an lo tih thin” chumi ngei chuan an banah ve ve an han inchhun ta ani. Chumi SER ngei chu an ngaihzawng te nghilh loh nan, lungleng takin an chul, an zut, an en thin ngei ang.

Lehkha thawn lah ziak leh chhiar thiam an tlem avangin, mi chhiar tir a ngai, phone a la awm lo mobile phone-a sms biahthu thawn te phei chu la awm lo chiang si. Hetia an hmangaih a ni tih an in REMIND-na ber chu SER an in-chhun (siam) hi a ni ta a ni.

Sipai tang ho ten an hmuh ngun ber chu hetiang kawldai hling nei ang hi ani. Shillong lam-ah phei chuan tam pawh a tam leh zual. Nalh em em-in palchawi ah an hman hmuh tur a tam ang. Chung karah chuan, kawldai par pawl riai hian khawilam mah a hisap tir lo, an khua se-dai an kanpui, an lawmnu te’n “ka bialpa hi ka pasal ngei tur a ni” ti-a rinawm taka lo nghak tu bak an mithla ka ring thei lo.

Misual ho bawl phawnah, duh leh tunlai mil turin, ka han chhawpchhuak a ni e. Ka lawme.

muantea
Submitted on 2009/06/15 at 11:51pm

Nghilh loh nan ser ang ‘cham’ thei tak maw! tih a ni zawk em? Kawldai (forget me not) par pawl riai mai a phuahna mai niin a lang.A hling in chhun tir,kawldai leh sava pahnih,forget me not par leh sipai,Pahlira Sena Chawngthu leh Amar Akbar Anthony tih vel hi ka ngaihtuah buai lo mai te’ng! Kawldai par hla a phuah a, rem leh dik em emin Major leh minor chord in a then hrang a,hla satliah lo tak a ni tih mai hi ka’n sawi rih phawt ange.

samuelapa
mizoramsynod.org
Submitted on 2009/06/15 at 11:58pm

A hla thu hi a tha, a thluk pawh a dangdai. A satu hian a sa nalh ka ti vak lo, music arrangement pawh hi a mawi ka tih zawng a ni lem lo, lead guitar phei hi chuan min hruai bo lek lek emawni chu aw? ka ti deuh. Tin, inserted pics leh a hla thu a inzawlna ka hre vak lo. Music beat leh pics inthlak lai hi a ’sync’ tha tawk lo bawk. A satu a lang lem lo nain ‘lips sync’ dik lo deuha zai en a ang ka ti tlat.

chawnghilh
Submitted on 2009/06/16 at 12:29am

Music & Lyrics a ni hluai nain, a LYRICS lamah mzvision hian mi rawn tibengvar hawk mai. Kawldai-par phuahna satliah —thawka phita P S Chawngthu ngaisang laklawh tawhten a vul mawi thei ang bera he hla hi an lo sawimawi satliah trhinah ka lo ngai thlarawk a … Engineering College chhuakin mi han hrilhfiah ta chiam mai chu … ka va han paw-fuh char char tak em! Lawmthu sawi nan he ka Car thar hi lo thlir ve mai mai ang che —

Tin, sipaia trang, lehkha thiam sang chuang lote khan kan Mizo literature hi an lo chang chiangkuang hle trhin hian ka hria; sipai lungleng di ngai bang thei lo te thawenthu atranga phuah chhuah hlate hian Zofate hi kan lo inawi dup dup mai zawng a nih hi! Khatia kawldai-hling ngei maia Romantic Scar inngaihhruih nachang an lo hria kha —SMS tih vel ai chuan a ril hle zawkin ka hria. A ni lah tak a, Shillong hmun tam takah zing PT Exercise lak pah ringawt pawha an hmuh fo tur KAWLDAI a rawn par pawt lep pawha REMINDER ni ta zel pawh hian … mahni vangkhua lo luah lumtu Di-bawihteii ngaih a tizual hle mai tur chu … hla namai lo tak a lo ni e. Rawn post lo phei la chu, ka ngaihsan phak vak loh hla a la ni reng tur hi a nia! Tunah chuan, i zarah ka tem ve ta feih feih e … a va ril reuh em!

chawnghilh
Submitted on 2009/06/16 at 12:37am

Sam ang trhen ni te hi,
Lo her chhuak leh trhin e,
Ami leng tawnah hian
Tuar dan hril thiam awm maw?
Duhlai-leng zing zin tur
Hnah nem hling par an hlan,
Nghilh loh nan ser ang cham thei tak maw?

Nghilh loh ngaihhrui thu di
Thlun nan lo par chhuak e
Intrhen ni lo her chang lunglen damte’n thawi nan
Vangkhaw sira sedai theuva pal kara’n
Thliah lai nghakin a lo par pawl riai.

chawnghilh
Submitted on 2009/06/16 at 1:16am

Vanah khian mihring sulhnu, thil pakhat a awm ve ta. Chu chu Isua nakthawl, kut leh ke-a a SER-te khi an ni.

The Old Man and The Sea by Ernest Hemingway pawh —a phena thu inphum hailan tum phetin English Criticism kan zir phah ve a —ni thum leh zan thum teh meuh tuipui chunga sangha, harpoon tum leh harpoon hruiin a hrut thler sanghamantu kutphah te, tlang lam pana chau tak chunga a lawng puanzarna ngul (mast) a pu ngawk ngawk dungthulin Nazareth Isua —a kross pu leh hliam tuar, Kalvary tlang pan ta angin kan hmehbel lui hram hram zel ang tho khan —mihringte kutthak a tawrhna SER chu Isua tan leh a chhandam fate tana ROMANTIC SCAR mawi tak a la ni ve ngei dawn a nih tak chu, tiin … P S Chawngthu hla hausakna hak han tihzauh lehzual nan ka rawn belhchhah duh ve hret a ni e. Administrator-te ngaihdan ni vek kher lo mah se, Ka lawm lutuk tho ve.

Zorunpuia
zorun.blogspot.com
Submitted on 2009/06/16 at 1:42am

Youth Icon an thlan tuma Mîmi Lalzamliani’n a hanga a sak kha a ni a. Recordig puitling emaw uluk taka sak pawh a ni lo va. Tin, a hanga sak a nih avangin a beat vel pawh music tel nghal nena sak nen chuan a inang lo a ni. Mimi Lalzamliani Aw chu youtube atanga lain hetiang hian a music hi hmehbel mai mai a ni a.. Uluk tak leh nalh tak tura tih pawh a ni hran lo. A siamtu hi a lung a leng em a, a han ti thla ve rawk a ni tih hi hriattur a ni..:)

PS/ he hla hi chu Mizopa kutchhuakah chuan nalh dangdai pawl tak niin ka hria. A thu a un nalh a, a thluk a mawi hle bawkin ka hria.

chawnghilh
Submitted on 2009/06/16 at 2:05am

Tin, sipaia trang, lehkha thiam sang chuang lote khan kan Mizo literature hi an lo chang chiangkuang hle trhin hian ka hria … TIH AWMZIA hi

Mizo tlangval, vai sipaia zu trangte DRAMA IN REAL LIFE kha kan Mizo hmanlai, tunlai hlaah te hian kan phih lut nasa hle a —anniho ber mai khan min lo awi tlei hneh ber trhin niin a lang, ka tihna a ni ber e.

A dawtah chuan kum 1970s chho vela Lalsangzuali Sailo te trhianzaho, Thingsai leh a chhehvel nula leh tlangval rual, Shillong-a zu inzirte khan trhangthar an rawn chawm leh ngawet bawk mai!

mzvision
Submitted on 2009/06/16 at 2:45am

hlaphuahtute hian an phuahchhan mihring te poh an nei a trhen chuan neilo poh an awm ngei ang, an phuahchhan leh a thu in a tum zawng zawng sawifai leng hi a ethical lova sih-hawnna te chu an lo sawi ri hlek trhin mahna 😉

Read between the lines kan ti dawn nge ❓ read beyond the lines kan ti ang 😉 chu chu hla thu bawl phawn tiin kan dah ange. In bawl trha hlawm hle mai, han bawl belh zel teh un.

PS Chawngthu hian a hlate a bu-in a chhuah, a bu ngei a neitu in a roh em em kha ka lo en anga ➡
Nghilh loh nan ser ang cham thei tak maw? OR Nghilh loh nan ser ang chang thei tak maw? ka rawn confirm dawn nia.

@Chawnghilh i bawlphawn belh dan hian miril i nih zia a tilang. Ka lawme

@samuelapa Mimi Lalzamliani’n Youth Icon elimination round (?) a a sak zorunpuia sawi anga music belh anih avangin i sawi hi ka trawm che. Rebecca sak leh Ruati sak te kha Mp3 in ka zawng dahtur ka hmu si lo 😦

Engpohnise a thu hi i bawl belh zel teh ang. Ka lawm e 😀

Zorunpuia
zorun.blogspot.com
Submitted on 2009/06/16 at 9:25am

Hei hi kan thiannu mission veng nula Lsi , Pu PS Chawngthu te thenawm lawka awmin amah Pu Sena hlabu ngei atanga a copy chhawn ka han tarlang ang e. Tin, he nula hi PS Chawngthua zirtir ngat a ni a. Midangin a thluk leh a thu tlema a lam dik loh lai pawh a hrilh chat a ni.

“Sam ang then nite hi lo her chhuak leh si e,
Ami leng tawnah hian tuar dan hril thiam awm maw;
Duhlai leng zing zin tur hnahnem hling par an hlan,
Nghilh lohna ser ang cham thei tak maw.

Nghilh loh ngaihhrui thu di thlun nan lo par chhuak e
Inthen ni lo her chang lunglen dam ten thawi nan,
Vangkhaw sira sadai theu a pal karah,
Thliah lai nghakin a lo par pawl riai”

Rebecca Saimawii te khan “Samang inthen ni te zawng” tiin an sa thin a, a phuahtu erawh chuan “Inthen ni te hi” tiin a dah thu te pawh a sawi. Ka lawm e.

m_bawitlung
Submitted on 2009/06/16 at 10:41am

“Vangkhaw sira se-dai theuva pal kara’n” tih laia “theuva” tih khi “theuna” tih tur a ni lo’ng maw le!!!??? se-dai theuna pal kara’n a nih ka ring zawk e a!

XaiA
Submitted on 2009/06/16 at 11:05am

A van lunglen thlak ve le!Tun hma lehkhathawn kan nghahhlelh thin zia te min ti hre chhuak thar leh a lawm! He hla hi kan lo buai pui ve thin khawp nia ,mahse a thu kan lo chik em em ngai law,SER tih lai vel hian in pumpek na a va han ti chiang em! A pangpar hi eng ang tak nge ni ang tih pawh kan suangtuah ve thin.Artistic concept hmang a ka lo ngaih tuah danin pal kar a thliah lai nghak parpawl ria chu
parpawl

Tun hma sipai Lucknow a trainning an bial nu ten an thingphur han tlu palh turin “Aw ka rei Lucknow” an tih thla zen thin pawh ka ngaihtuah thleng nia!!

riangtleii
Submitted on 2009/06/16 at 11:19am

@Zorunpuia – I thiannu LSI kha college kan kal ho, He hla ngei hi College Week Solo competition-ah a sa a, thiam ka va ti teh reng… pakhatna a nihpui ta nghe nghe-in ka hria. A phuahtu ngei bula zir a lo nih vang a nih chiah chu..

A hla-in a rilin a thuk a, a hlu hle bawkin ka hria.

mzvision
Submitted on 2009/06/16 at 11:39am

Kan hre dik teuh thiak thiak hle mai 😆 PS Chawngthu hlabu ami ngei ka scan anga ka han dah har lovang

Sam ang then ni te zawng,
Lo herchhuak leh thin e,
Ami leng tawnah hian
Tuar dan hril thiam awm maw?
Duhlai leng zing zin tur
Hnahnem hling par an hlan,
Nghilhloh nan ser ang cham thei tak maw?

Nghilhloh ngaihhrui thu di
Thlun nan lo par chhuak e
Inthen ni lo her chang lunglen damte’n thawi nan
Vangkhaw sira saw dai theuna pal karah
Thliahlai nghakin a lo par pawl riai.

XaiA
Submitted on 2009/06/16 at 12:18pm

@mzvision:A hlathu hnuhnung ber a i tarlan a tang hian a chiang ta kuar mai…Sedai/sadai theu va,theu na tih lam ni lovin Saw,daitheuna pal kar a saw tih ang a lo ni tih a chiang a, i taimak zarah kan fiah uar mai a lawm!!

m_bawitlung
Submitted on 2009/06/16 at 3:53pm

“saw dai” tih nge “se-dai” tih.. hmanlaiah chuan khua hi an hung thrin a… chu chu se-dai an tia… chuan pakhat leh “pal karah” tinge “pal kara’n” tih??? ..la ti tralh teh aangg

samuelapa
mizoramsynod.org
Submitted on 2009/06/16 at 4:15pm

“Vangkhaw sira saw, dai theuna pal karah”
tih hian a awmzia a man theih deuh em?
Eg. Sawta saw, m_bawitlung a lo kal e.

lara
Submitted on 2009/06/16 at 4:24pm

I rawn sawi an khi chu anih ka ring vak lo.Mahse ka hre chiang vaklo.He hla hi a nalh a,lung a tileng a,rilru leh tihtak zeta ngaih thlak hian mi a hneh a.Thiamtaka sak ngaihthlak a chak awm khawp mai.

mzvision
Submitted on 2009/06/16 at 4:26pm

A hlathu solfa nen tlem PS Chawngthu thiziak nen ka nei tawh pdf/jpg in ka scan zawh-ah ka han dah ang.

Ka duh ber chu a thu in a ken han bawl phawn vel hi a ni e 😆

m_bawitlung
Submitted on 2009/06/16 at 7:02pm

ka lawm e

Zorunpuia
zorun.blogspot.com
Submitted on 2009/06/16 at 9:06pm

Hla thu ril deuh hriatna em em chu inhnial lawihna tham a ni thin reng e, an tia lawm.. He hla hi a ril hle a ni ngei ang..:)

@riangtleii, LSi chu i thiannu ngei chu a ni ang. Keipawhin a zai hi ka remsak ve nasa thin khawp asin.. Nula zaidam, Pathian tihmi, nunchang mawi tak a ni a. A Zonu hle bawkin ka hria. Lengzem a sak pawh ka hre ngai der lo kei chuan..

mzvision
Submitted on 2009/06/16 at 10:09pm

Heile hla thu (phek 1)

leh phuah chhan tlem (phek 2)1/2

(phek 2) 2/2

leh PS Chawngthu chanchin

mzvision
Submitted on 2009/06/16 at 10:11pm

@zorunpui Lsi hi sikulkawn bula phei keuh kha mi, zaithiam asin, mahse missionary in kal daih lo maw ❓ hei hla thu chu a bu ami ngei ka han dah e. hlut ber zing ami tur ah ka ngai che

Zorunpuia
zorun.blogspot.com
Submitted on 2009/06/16 at 11:17pm

Ka lawm hle mai. Aw Lsi chu i sawi ngei hi a ni e. Nia, M.com a zo va, Samo lamah missionary in a thawk ta daih mai.. a nunchang kha a missionary bawk em a ni.. Nula ngaihsan awm tak a ni e.. I thil min hlui chu ka lawm hle mai, ka lo save keuh ang e..:)

Khelawks
Submitted on 2009/06/17 at 1:06am

Vangkhaw sira saw dai theuna pal karah a lo par pawl riai…han tih hnap mai hi a mawi chungchuang ngawt mai..thliah a chakawm hliah hliah mai ,a milem lang hauh si lovin rilru a kaihruai vawng vawng thei nia..mizo hla zingah chuan belhchet dawl leh thluk lairil fan ngaih ka tihte zinga mi a ni..good post.

mzvision
Submitted on 2009/06/17 at 3:58am

PS Chawngthu hi lam waltz etc poh a thiam khop mai an ti. chawnghilh hi zanin chu a va reh ve kan miril hi a reh tlats

mzvision
Submitted on 2009/06/18 at 1:35am

@zorunpui
ka beisei angin he hla hi misual ho hian an bawlphuan trha duh lo riau. PS Chawngthu an a phuah dan a sawi atrang hian novel pakhat tun emaw phuah sela. Hei ka scan kha text-a chantir kan zira, i lo roh takin hei aw ➡

Nghilh lohna par

Sapho hian an ngaihzawng, an thiantha te, an chhungkua te, hmundanga kal sawn emaw, zinbo tur pem tur emaw te reng reng hi an thlah dawn hian pangpar chi khat bawr ve deuh reuh, pawl deuh riai hi awm-ah an inthiahsak thin a; chu chu englai pawha intheihnghilh loh nana inhrilhnaah an hmang thin a. Chuvangin, chu pangpar pawh chu a hmingah Forget- me-not an ti nghe nghe a. Chutiang deuh chuan kum 1940 bawr vel leh a aia hma hret-ahte khan Mizoram-ah pawh mi thenkhat chuan inthlah nan pangpar kawr inthiahsak an ching ve thin a. Amaherawhchu, forget me not pangpar tak erawh chu Mizoramah a awm loh avangin amah ang deuh maia bawr deuh, a par pawl ve chu an hmang thin a. Chutiang par chu chunglai chuan hmuh tur a tam em em a, mitin mai hian huan hung nan an hmang a. A thente chuan rualmam tha takte pawhin an chep thin a. He hnim hi hling tur tha tak nei a ni nghe nghe a. Chei loha thlahthlam anih chuan lian tak tak leh sang fe pawhin a to thei a ni. Chei that anih chuan a par duh meuh lo, chei loha to anih chuan bawr tak takin a par chuai thin a, chumi pangpar chu ‘Kawl dai hling’ tiin an vuah a. Kawl dai pangngai anga hnah lian a ni ve lo.

He pangpar hian, hling a neih avangin bawng ilo te pawhin an tawn ngam lo. Thil pung duh tak, a englai kuang pawh phun ila nung zel thei chi a ni. Foreign atanga ka lo hawng, kum 11 lai Mission veng, Aizawl ka chhuahsan hnu-ah kan rawlthar chhuah vela kan chul hluite kan naupan laia thangthlêng leh sahdal kam thinna hmunte, sava vehna hmunte chu fan tumin tlai khat chu ka chhuak a. Chu’ng ka han sawi hmunte chu in leh huan-in a lo khat vek tawh a. Ram palai leng mai thinte kawng leh lamlianin a thlur sung tawh a. Ramhnuai anih laia ka by heart that tehlul nen in leh huan leh kawng alo awm chinah chuan ka leh bo daih mai!. Chutia ka vah vel naah chuan hmana lo a nih laia bawng leh kel luh theih loh nana sedai an theuna hlui karah chuan Kawldai hling sang taka to, tang sei pui pui nei hi ka hmu a, a tang sei pui hmawr ah chuan par bawr tha fahran mai hi a uai zawng hian a lo par a. Hmanlaia kan chin anga inthlahna leh intheihnghilh loh nan tia kawldaihling-par pawl kan thliaka kawr awma kan inthiahsak lai ang kha chu ni se tuemaw chuan an thliak ngei in a rinawm; mahse tunlaiah an ching ta lova. Chuvangin, chutianga thliak tur chu nghak niawm takin pawl riai-in a par a nih hi, tiin hla ka phuah chhan ta a ni.

Zorunpuia
zorun.blogspot.com
Submitted on 2009/06/18 at 2:04am

Ekhai, a ngaihnawm hle mai. Ka lo save hmak hlawm e.. i zarah ka hla duh tak mai chanchin leh kalhmang ka lo hre thei a. Thiannu LSi pawhin mi rawn mail a, a hlabu a mi ngei ka copy chuan ka inhria a, ka record ah ka sa sual pawh a ni mai thei a, Tin Pu PS-a pawh a la dam lai kha a nia, a ngaithla ve tho a, engmah a sawisel thu ka hre lem si lo va.. ka sa sual ang a, a sawisel duh lo pawh a ni mai thei bawk e.. a rawn ti hial..

mzvision
Submitted on 2009/06/18 at 2:11am

Lsi chu facebook atrangin ka zu hrilh a lom le. Concert for Gujarat ah khan ka fapa te nen an zai hova, a zaithiam sia a nungchang a mawi bawk si, lehkha lamah duai bawk silo … hei chuh ka tih lain missionary lamah a kal ta daih a.

A U hi DU a a kal laiin, kan farnu te nen hostel khatah an awm trhin, min bazar pui zak zak trhin mawle. Ka hriat mi tak chhung an nia, khawthlang kawrte lam chhuak te poh an ni deuh asin 😀

Thuziak hi thiam ila chu he hla hmang hian love story novel a siam theihin ka hria 😆 Aizawl i lo chuan chhuah chuan he hla hi MI kan nei anga kan sa ho dawn nia

Zorunpuia
zorun.blogspot.com
Submitted on 2009/06/18 at 2:25am

Tehreng e.. Keipawh thuziak thiam tak chu ni ila, eng emaw zawng taka han kawih her a love story tha tak chhuak thei ngei tur chu niin ka hri. Mahse kan thiamna hian a tlin si lo..

Lsi sawi takah chuan kum 1999 vel khan a zai ka rem sak ve zauh zauh thin a, Biak In leh hmun dangah te pawh, hla zir hmaa tawngtaina nena inhla thlap thlap zel mi a ni a, nula nungchang mawi tak chu a ni..

I fapa chu a la tlangval ngei awm si a, a va sawirem mai chi awm ve.. puar-ak lam chan chu ka huphurh miah lo a nia..:)

mzvision
Submitted on 2009/06/18 at 2:25am

Novel chu siam dawn ila chapter hrang hrang turte-
1) Thulairil thawi zeuhna
2) Hmanlai zokhaw chanchin
3) Lal hunlai
4) A changtute naupan lai
5) In ngaizawng tran chho
6) Sipai a intlar
7) Sipai kaltur inthlah
8 )Shillong rawngrut lai
9) Shillong lama hmelthra hmu
10) Indopui lai
11) Rualawh vangin lehkha zir trha leh
12) An khua ah a hawng
13) A bialnu nau a lo pawm
14) A thil hawn puarak a pek tir
15) Thihrui a dawng BA a passed thu
16) Zirna sang bei zel turin khawhar takin an khua a chhuah san
17) A tawp ta 💡

mzvision
Submitted on 2009/06/18 at 2:38am

Heng thawnthu ka mithla hian Ngopa lam ram vel zuk lang daih mai a. Lalzidinga chanchin te kha han lang nawk nawk mai sela. A changtupa kha Ngopa middle sikul zirtirtu atan te, a BA exam zo han hawng kha han sawm vel sela.Nang hma han la teh 💡

kan fate hi zawnpui an ngai lo hle zel mai ❗ mahse nizan ka damsam lo min han kan tu Dr fiamthu chu (nula rim tam chuan mi nu leh pa te psycho chu i man ngei anga NOI) –

Kan fanu te hi an nausen lai chuan bawlhlhawh a luh hlau reng reng in kan venga. An lo leikang an tleirawl chho lah chu mipa thil a hun lovah a lut ang tih hlau reng rengin kan veng leh a. Hei an han nula senior chhova mipa thil luhna tur an hmu zo lovang tih hlau reng rengin kan buai leh zawng anih hi” a tia kan nui tlorh tlorh mai mawle 😆

H.Vangchhia
Submitted on 2009/06/18 at 3:06am

Makurin (Rebecca Saimawii) a sak atang khan he hla hi kalo beng-hriat ve tan a.Hmmm, tun ah hetiang hian a thu meuh in lo pho chhuak leh ta… vawi 7 tak meuh a thluk dan dikin, kan chhiar chhuah nawn awn awn chu le.

Hla thu ngei maia lunglen thu, di ngaih hla hranghlui ten an han chham leh phuahchhuah te hi zawng a lo rilin, a mi fan a fiak ril raih mai le.

Khawtlang lunglen leh Di ngaih Lunglen hi engemaw zawng tak chuan anuam hi ka ti thin…ngaihtuah hi a kal thui a, suangtuahna in kan khatliam bawk si nen…

“Se-dai theuna pal” eng anih tih hrelo emaw, la hmulo emaw pawh hi kan tam tawh awm kher mai…

mama_khiangte
Submitted on 2009/06/18 at 10:53am

He hla hi Mizo hla ah chuan nalh ka tih ber leh tha ka tih ber ani a, chuvang chuan zaithei nazawng sak atan chuan ka phal lo. Rebecca Saimawii khan a sa thiam ber a, record that leh a tum tlat in ka hria.

Advertisements

17 thoughts on “Nghilh lohna Par

  1. A originalah pawh an chhu sual ve tho a ni maw?

    “Vangkhaw sir a saw dai theu a pal kar a’n” nge niang a

    “Vangkhaw sir a saw dai theu na pal kar a’n” tih zawk tur???

      • ‘karah’ tih hi Pu Sena duh dan tak a ni.
        A sawi dan chuan ‘ah’ tih lai tak hi a thluk duai duai theih loh. Hetianga thluk tawp deuh chat ngai hi helai chang a stress-na a ni. Tin, a dawta rawn zawm lehtu- ‘Thliah’ nen hian a rhyme a in man fuh chiah.

        A sawi dan hi a hla thu leh a thluk nen uluk takin ka zir ve ngial a, a lo dik khawp mai. Heta ‘ah’ a hmang hian a hla mood hi a phawk fuh khawp mai. Lungleng lutuk hnuk ulh, tawng laklawh lai tawp deuh chat hi ka tehkhin ber. Hemi atanga chhut chuan ‘karah’ tih rawn zawmtu ‘Thliah lai nghakin’ tih tlar pawh hi thluk duai duai chi a ni lo tih a hril nghal bawk.

        Ka’n tlak tak duah chu

  2. @lushai_er
    I comment chungnung zawk hi a dik hmel ani. PS Chawngthu ngei siam amah ngeiin a present a hlabu ami ka scan hi han en teh i chiang kuarh mai ang chu

  3. Dream avan ang ve, a rau ah min hruai lut ve hman trep alom le.kalo mitthla vel chhiar chhungin!! Question tam tak rilru ah alo lut bok ,mahse ka rawn tilang lo ang.
    Mizo hmanlai nula leh tlangval nun hre lo tam tak kan awm tawh avangin Novel pian phahna tlak a niin a lang.Novel atan a Chapters tur i thensa hi i thiam hle, mahse sipai rimnam ami lo tan chuan pawhfan a harsa ngotin ka ring.Khang hunlaia,inbiak pawhna tha lo, lehkha thiam loh nen,an in ngaih mai piah lamah an in nghak peih,an lo rinawm hlom dan tur te a suangtuah theih, chanchin nitin inhrilh theih poh nilo chungchung a han innghah a, lungleng lutuk tur huphurh dan tur te, an kawldai hling SER insiam en mai pawh a, an inhnem dan te chu ziah tur a tam dawn riau. SER an insiam tawh hnu a innei lo te an awm ve ang ngem? tih te rilru ah a awm thei bawk.
    He hla hi a ril ka ti,hla thu un tak2 Mizo tawnga phuah hi a harsat ka ring. Tin, between the lines hriatthiam tum ngai lai hi a ti ngaihnawm tu leh ti romantic tu tak chu ania, a thluk hi lungkuai tak, ngaihtuah ti thui deuh chu ani.
    In ngaizawng, loh theih lohna vanga inthen trul si, inthen hreh lutuk, tih vak ngaihna hre lo, hling a Ser insiam a inthlah, in hmuh leh hun tur hisap vel tur te min dawn tir a, chutih rualin an lo ROMANTIC vel ee chu ka ti thar, zing zin chhuak tur te uluk takin an in thlah ve ngei chu niang ah,an va lo in ngai ve dawn em!!! an intheh huphurh dan tur zia chu…
    Kawldai hling mai pawhin hla phuah tura a trigger theih chuan,mi lungleng thei nih pawh angai ang ka ring. PSC ziak ngei i rawn dah hian a hla thu awm dan tur min hriatfiah tir thei deuh.
    tin, “THEU” tih hi, ka hrethiam vaklo, Sanglianthanga hla a, “daitheu tute ” tih a dah pawh amah ka zawt ngat ani. Helaia theu tih hi an sawi tum a in ang angem le? Ani chuan daitheu chu,daidanna, thianfai, then hranna tih lam in a sawi deuh. He PSC hla a,”Dai theuna pal karah alo par pawl riai” atih danah hian a in an ka ring deuh bok.
    A pawimawh lai ni ta ber chu “IN NGHILH LOH NAN”a “SER” siam trul ni a hriatna/duhna khop hmangaihna hi alo thuk hle dawn anih hi le!!!!

    • Dai theuna pal karah alo par pawl riai” a tih hian hmangaihna parmawi inthlahrung tak mite laka zep si chu hmangaihna parmawi biru si chu a phawk chhuak hle in ka hria. Hemi hla atang hian Novel ziak mi chu ni ila ka puitlin tawh anga a film pawh a hit viau ang ka ring

    • High School kal lai min ti hrechhuak – ;-))
      She Dwelt Among The Untrodden Ways by William Wordsworth
      First version

      My hope was one, from cities far,
      Nursed on a lonesome hearth;
      Her lips were red as roses are,
      Her hair a woodbine wreath.

      She lived among the untrodden ways
      Beside the springs of Dove,
      A maid whom there were none to praise;
      And very few to love;

      A violet by a mossy stone
      Half hidden from the eye!
      Fair as a star, when only one
      Is shining in the sky!

      And she was graceful as the brrom
      That flowers by Carron’s side;
      But slow distemper checked her bloom
      And on the Heath she died.

      Long time before her head lay low
      Dead to the world was she:
      But now she’sin her grave, and Oh!
      The difference to me!

      Second version

      She dwelt among the untrodden ways
      Beside the springs of Dove,
      A Maid whom there were none to praise
      And very few to love.

      A Violet by a mossy stone
      Half-hidden from the Eye!
      —Fair, as a star, when only one
      Is shining in the sky!

      She lived unknown, and few could know
      When Lucy ceased to be;
      But she is in her Grave, and, Oh!
      The difference to me.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s