Ruati Zoram-Rose

Dubai-ah Global Tourism Map-a Mizoram dah tura a hmalakna kal zel-ah a boral hlauh mai. A vuinaa thuziak hi kan dah ang e.

B. LALRUATTLUANGI (1980-2013) CHANCHIN

B. Dawngliana (Mizoram Cotton Mills) leh Laltanpuii te fa tlum ber B. Lalruattluangi hi 18.12.1980-ah Civil Hospital, Aizawlah a piang a.
A ute chu :
1) B. Lalpektluangi W/o Lalrinawma (Buanga), Electric Veng
2) B. Zarzokima H/o Vanlalnghaki, Electric Veng te an ni.
ZIRNA LAM : Nursery atanga HSLC Aizawlah a zawh hnuin Class XI leh XII chu CSKM., New Delhi-ah a zo leh a. Lady Keane College, Shillong atangin B.A (Eng.Hons) tha takin a zo leh a ni. B.A a zawh hnu hian Bangalore-ah Master of Tourism Administration (MTA) a zo leh a. MTA a zawh hnu, kum 2005-ah IATA leh UFTAA (International Air Transport Association leh United Federation of Travel Agents) Associations Montreal hnuaiah IATA/UFTAA FOUNDATION & EBT COURSE zir thei mi 33 an thlan zingah a tel ve a, chung 33 zingah chuan amah leh mipa pakhat chiahin he course zir zo theiin, Certificate an dawng a ni.

Hna a thawh hnuah Tourism course Programme for Young Leaders thla hnih chhûng Training, Govt.of Japan buatsaih Tukushima, Japan-ah training tura koh a ni a, he Japan International Cooperative Agency hnuaiah hian hlawhtling taka training-in a hun takah Certificate a dawng ve leh a ni.

HNATHAWH : Heng a zirlaite tluang taka a zir zawh hian kum 2005-2007 chhung Air Deccan-ah a thawk a. He a hna hi bansanin a zirlai atanga a lo tum rilrûk ve rêng thin, Tourism Agency, Serow Tours chu ama pualin din a ni a; kum 2007-ah Millenium Centre D-74-ah office a hawng a. He a office hi khatih laia Mizoram Sawrkar Tourism Deptt. Secy. Pu Vanlalhuma’n a hawnsak a ni.

Zin mite hnenah Air Ticket-te pe chhuakin, India rama State dang mite leh India ram pawn atanga Mizoram chhûnga lo kalte a tul ang ang lo buaipuiin, an zin duhnaah te a hruai kual thin a; an ticket bâkah an mamawh chi hrang hrangte lo buaipui chu a hna ber a ni. Mizoram atanga foreign zin duhte pawh buaipuiin vawi eng emaw zat a huhova zin te a hruai a. Mi chi hrang hrang leh chet ze inang lo leh danglam, kum inthlau tak takte a buaipui pawhin thatho tak leh hlim takin a buaipui vek thei a ni.
Ruati hi mi tumruh leh tum sang, Zoram tana thil tha tih duh, ram dang miten Zoram an ngaihhlut theihna tura rilru, tha leh thiamna sêng nasa ve tak a ni. ‘Tourism map-ah hian Mizoram khawvel hi pho lan ni ve se’ tih hi a ngaihtuahna leh a duhthusâm a ni. Thalai tih tur nei loa awm mai maite hi a vei a, Agency lian deuh tak din chuan thalai tam zawk a chhawr theih dan tur a ngaihtuah nasa ve hle thin. Kan ram mawina hi chei belh a ngai lo, a nihna ang ang hian a mawiin khawvel mite hmuh tura pho chhuah tlak a ni tih ngaih dan nghet tak a neih bâkah, Mizo hnam leh culture te hi kan nih ang ang hian khawvel hriata pho lan tlâk niin a hria a, chu chu a tum ber a ni. Culture lam atanga thlir pawhin amah avang hian mi tam takin Mizoram an hriat phah bâkah Mizote hawizauna kawngah sûl a su nasa ve hle a ni.

Heng a duhthusam te hi la hlen vek thei rih lo mah se a phâk ang tawkah theihtawp a chhuah a, a thlentheihna kawng dik nia a hriat he Agency hi a din ve a, amahin a hmathlirte hi hlen vek lo mahse heti lama tui mite tan hmachhawp tam tak a siamsak ve a ni.

A MIZIA : Mi hlim thei tak leh tawng duh tak a ni chungin mi chanchin chhe lam a sawi ngai lo va, a pian tirh atanga a thih ni thleng hian a nu leh pa, chhûngte rilru tihah zawngin a nung ngai lo. Chhungkhat laina buaipui ngai apiangte hlim taka buaipui thin mi a ni. A sumdawnnaah thahnem ngai takin a thawk thin chungin dik lo taka sum a chan ai tur ni lo lak chu a duh ngai lo va. Sum a thawh chhuah ve nual hnuah pawh thawmhnaw manto leiin a inbel ngai loh laiin amah mai ni lo, a chhungkua, a unaute fa naupang tê tê hlimna a ngai pawimawh a, tihhlimna tur leh an zin khawthawnna tur chenin a ngaihtuahsakin a hruai thin. Chhungkhat laina te bâkah mi dangte pawh tanpui peih reng mi, mi dangte harsatna hrethiam tak a ni.

Mi lian leh mi hnuaihnung zawkte ang khat leh intluk renga ena thlei hrang miah lo, mize duhawm tlang tak nei a ni. Mi tu pawh hi mi lian leh hna sang thawk emaw, mi rethei leh eizawnna hnuaihnung deuha kan ngaih ang pawh mihring an nihna angin a en a, a thliar hrang ngai lo. Business skill nei tha tak a ni a, a Zo a vai, Sapho thlengin a thusawiin a hneh thei êm êm tlat hi a ropuina a ni.

Hmeichhia ani nãa, mi tumruh, huaisen tak, hriat ngai loh ram dai leh hriat châk mi, Pathian thilsiam leilung mawina hlim leh lungawi taka thlir thin, tha tura a ngaih chu a taka tih duh mi ‘Just Do It’ type a ni. Mizo nihna pho lan tum tâng tâng, mi biru, lâr leh lansarh tum ngai lo mi tak a ni a.
Mizote leh kan ram leilung mawina te hi khawvela a mawi zawnga tih-lan duh mi a ni. Mite hmuha lansarh aichuan hahthlâk tak pawh ni se a tih tur a tha thei ang bera tiha, a hma hlen duh mi a ni. Mi dangina ropuina leh mawina an chana, a par an tlan theih chuan a thawhrimnaah a lungawi êm êm a ni.

Ruati danglam leh êm êmna pakhat chu a thiante hi an ni. A thiante nunphung leh ze inang lo tak takte hian a nun zia a hrilhfiah awm e. Naupang, thalai leh kum upa, tar takte pawh a kawm ngeih viau zel a, Pastor leh Kohhran Upa puithû tak tak thian tam tak a neih rualin khawtlang ngaiha mi ho ve tak takte pawh an bãng chuang lo.

Eizawnna leh thiamna ah pawh vantlang chunga lêng leh mi hnuaihnung zawk pawh an nihna ang takin hlim takin a kawmngeih viau thei zel mai. A thiante nungchang leh duh zâwng, chhim tawp leh hmar tawp a inpersan anga zia leh nihna, duh zâwng inang lo, inhlat tak tak a kawmngeih êm êm vek hian a nun hausakzia a lantir hle. Lunghlu kil hrang hrang, mawina leh hlutna danglam tak tak nei ang maiin chhungkhat laina, then leh rual, khawtlang leh Sorkar Deptt.-te ui leh hmangaih a hlawh vena hian Ruati’n nun hlutna chi hrang hrang a lo neih vete min hmuh thartirtu a ni ve.

A nun hlim tak leh fiamthu duh tak, fiamthu sawia nui reng a nihna phèna ropui tak awm chu a Pathian tihna hi a ni. Nun awmzia chhût a, Pathian thu ngaihtuah thin mi a nihna hi a belchiangtuten an hmu thin. Pathian thu sawia, mi dangte nuna a dik leh dik lo teh kual ai chuan a takin a nunpui mai a. Miten an thlir dân tur ngaithtuahna avang te, ama hamthatna leh lungawina tur atana Pathian thu zawm ni lovin, Pathian thu, thu dik leh tha nia a hriat ang chu a nunin a zawm mai zawk a ni. Sakhaw mi tak anga lan leh hriat nih duhna a nunah a lang lo va, sakhaw mi tak anga min an hriat loh aiin a hre chiangtute chuan Pathian thu a âwih hle tih an hmu ve fo thin.

KOHHRAN LEH KHAWTLANGAH : Zirna avang leh hna avangin khawtlang leh Kohhranah a inhmang tam thei lo va. Tunah hian Presbyterian Kohhran NPSS Beginners’ Deptt.-ah zirtirtu a ni a, Kristian Thalai Pawl Group thenah Zakaria Group Committee Member a ni ve. YMA-ah Section Committee Member a ni ve thin a, kumin 2013-ah hian Literature Sub. Committee Member a ni ve mêk bawk.

A THIH DAN : An thenawm nula, a thiante pahnih nen a sumdawnna huang zauh nân Agent zawn pahin Dubai-ah hian chawlh hmang turin an kal a. Ni 26.09.2013 khan Aizawl an chhuahsan a, 27.09.2013-ah Delhi-ah thlawk thla in 28.09.2013-ah Dubai an thleng a. 29.09.2013-ah zin miten an tlawh thin thlalêrah an kal a. Thlalêr fan kual hmain Quad bike camp-ah an kal hmasa a, bike chu ama’n khalhin a thiannu a phur bawk a, thlalêr vaivut pawngah an motor chu letin an chesual ta a ni. Vanneihthlâk takin a thiannu chu a him a, ani erawh chu a inhrenbehna (seat belt) a lo that tawk loh avangin a vanduaiah a tang ta a ni.

An chetsual hlim hian a thiante bulah chuan, “Khumi, sorry aw, ka na angreng khawp mai!” a ti a. “E, Ruat, i tha mai ang, ambulance kan ko ang a, damdawi inah kan hruai ang che,” an ti a. “Ambulance koh a ngai lo vang, in tih tur ang angte kha hlim takin ti ula, ti hian ka lo chawl ang a, ka tha leh mai ang,” a tih hnu chuan a mitmeng atangin a na hle tih an hria a, ambulance koin damdawi in an panna kawngah a peih lohsan ta a ni.

LAWM THU : He thihna chungchangah hian lawm thu sawi tur tam tak kan nei a, Pathianni zana an chanchin kan hriat atanga vawiin ni thleng hian kan hriat sên loh khawp lawmthu sawina tur tam tak a awmin kan ring. Hming lama lawmthu sawina awm, kan thihna avanga theihna, finna, tha leh tui leh mahni neih sênga min buaipuitu tam tak veng chhûng leh pawn atang te, Dubai leh Mizoram chang ni lo, India rama khawpui thenkhatah pawh tam tak kan nei che u tih kan hria a, kan lam chhuak kim thei dawn lova hriatna avangin kan lam chhuak ta lo che u a, min hriatthiam kan beisei e.

Dubai-a Mizo Welfare hruaitute leh Mizo awmte, Cairo-a India ram palai office-a thawktute leh Delhi lama kan sawrkar mi leh sa, kan thihna chungchanga hma min laksaktu te, Mizoram Sawrkar mi leh sa te, vawiin ni-a a ruang kan in min thlensak tura ni tam tak min buaipuitute chungah thinlung takin lawm thu kan sawi e. In mi buaipuina leh kan tana in tha leh tui in sen zawng zawngte hi kan chhungkua hian kan rul sêng lo vang.

A chanchin kan hriat zan atanga ni tin zan tin kan lungngaihna min hnêm tur leh kan ritphurh min chhawk tura thenrual tha veng chhûng leh pawn atanga lo kal zawng zawngte chungah lawm thu kan sawi a. A ngaihna kan hrethiam lo va, rilru chi-ai tak leh bangbo takin kan fanu duh tak thihnain min deng ta dawt a ni mai a, henga ka ngaihtuah thiam phâk loh leh hriatthiam phâk bâka ngaihtuahna sênga, hma min lâksaktute zawng zawng chungah kan lawm hle. YMA leh khawtlang hruaitute Mizo te mizona vawng nunga tih tur tûl ang ang min tihsaktute avangin kan thla a muang hle.

Keini chhungkua tehlul hetiang fanu min pe a, a nun kawng min hruai ngilsaktu, mihring kan chan loh hnu pawha ram hla tak atanga a ruang kan in min thlensak tura theih tawp chhuahtu mi heti zozai min petu kan Pathian chungah kan lawm a. He thihnaah hian Lalpan ropuina chang se tih hi kan tawngtaina a ni e.

A THIAN THENKHATTE THU HNUHNUNG:
A lian a tê, upa leh naupang, mi hausa leh rethei pawh thliar hrang lova inang khat veka mi zawng zawng kawm thiam, engtik lai pawha biak nuam leh thiante tana inhawng reng thin mi a ni
– Mapuii
Ruati hi mi hlim thei tak, rilru chhe pu lo, huaisen leh theih tawka mi dangte tanpui thin a ni a. Hetia hun lo taka min kalsan hi pawi ka tiin hriatthiam har ka ti tak zet a ni.
– Mamuana
Mi chanchin a tha lam lo sawi tur a hre lo hi keini Ex-Rotaract member of Aizawl City-te chuan kan hriat reng tur chhan tam tak zinga pakhat a ni ang.
– Mahuma
Kum sawm chuang ka hmelhriat chhunga a thinrim lai leh rilru hah hmel pua ka la hmuh miah loh, Ruattluangi, ka va ui tak che êm!
– RC-a Fanai
Former Rotar actor and Friend Ruati, I couldn’t believe my ears and shocked when I heard about your untimely demise. I will miss you and would never forget your affable character; your jovial, well-disposed, harmonious and out-going personality. I cherish the memories of the time we spent together. I am sure we’ll meet again in the after-life. Goodbye my Friend
– T.K-a
I hlim hmel leh i thu tha tak tak min hrilh thinte kha ka va’n ngai thin dawn êm! Kan zingah awm tawh lo mah la, kan rilru leh mithlaah chuan i cham reng ang.
– Berte-a
Yet another life taken too young. Rest in peace my friend.
– CJ Kurian
Kan chhungkuaina harsatna kan tawh laia min tanpuina leh hnemna zawng zawngte kha kan theihnghilh leh tawh lo vang.
– Mathara & family.
Thiannu…i va’n ngaihawm dawn ve! Pawm har kan ti a ni…mahse A rorelnaah kan tel si lo…ui tak chungin kan thlah lo thei lo che a ni … thlamuang takin chawl ang che…mangtha le.
– Rita
Thiannu, ka va’n ngai tak che êm! Krismas min rawn hmanpui leh ang chu ka ti asin, a va’n beidawnthlâk ve, lungngaih awm toh lohna Van nuamah min lo hmuak ang che o…Mangtha mai le.
– Lalnunpuii, Missionary, Nepal
Ka thiannu…naupan lai atanga tun hun thlenga min hre chiangtu ka hlim lai leh lungngaih laia ka bula awm reng thin, thlamuang takin chawl ang che!
– Milia, Durtlang.
Thiante hmangaihna, duhsakna leh hriatthiamna ngah mi, mi dangte tanpui peih reng, mi hlim thei êm êm a ni a, kum tam kan inhriat chhûng hian mi chanchin a mawi lo zawnga a sawi ka hre ngai lo…
– Tluangi
Tawrhna nasa tak leh harsatna namen lo takin a tlâkbuak mekte hnena thlamuanna thute hial pawh sawi ve thin khan sawi tur ka vàn a. Mitthla-ah i nui hmel a châm a. Khawvela inhmu leh tawh ngai lo tur kan ni tih han hriat hian a nâ ka ti. Mahse, ‘lo phu suh’ … kan la inhmu leh êm êm ang. |hian duhawm tak kan chân mêk lai hian Zoram hian a fahrin duhawm, mi dang tam takte suangtuahna a taka chantirtu, a thiam leh finna mahni tan maia hmang lova mipui rawngbawlna atana hmangtu, mi nuntlang tak leh ze ngeng lo tak mai, nun tam nei thintu chu a chân a ni tih hre ve tak ang maw.
– James, Guwahati.
B. Ruat, i awm tih ka ngaihtuah chhuah loh lai pawha, i lo awm reng thin kha a lo va thlamuanthlâkin, i awm lo tur chu a va kim ta lo êm! I nuna thil awhawm tam tak, inngaihtlawmna, hlim theihna, mi dang tana inpêkna leh mi dang hmangaih theihna te, nun zalên leh rualawhna thianghlim tak i neihte kha i bula awmten dam nan kan hmang thin tih hre siin engati nge i liampui daih mai le?…Vawi khat tal i dam nana tawngtai theihna hun nei ila ka van ti êm… naupang atanga upa ber thlenga an rilru hriaa hlimna petu, i ai kan awh zo dawn si lo va, i hlim lehzualna tur hmun pan pawh ni la kan ngai bang dawn lo che. Nula chhuanawm leh nun thiltithei neitu, Ruat, mangtha.
– Rca, Fanai
“Mizoram natural Beauty hi tichhe lo thei ang ber hian hma lak ni se, tih hi in pa lo hrilh teh,” min tih tuma fate rual lekin Mizoram mawizia min hrilh khan min hneh hle, kan va ui êm!
– Mrs. Pari Duhsaka

Inbound Tourists hip luh leh hruai luh kawngah hi chuan tuma’n kan tluk lo.
– Andy of VandyGo
Ruati, i hlim hmel leh sense of humour i ngahzia hi theihnghilh a har ngawt ang. Ka lo zin hnuhnung ber tuma chaweia min sawm ka lo ei ta lo kha ka inchhîr kher mai, kan inhmuh tawpna a ni mai dawn tih ka hre lo a ni, i Nu & Pa ka va lainat tehlul êm, i Pa nen kan inbia a sawi tur a vang hle mai. I chanchin ngaichãngin Dubai lama kan nau Mimi Hnamte awka kan ngaithla reng mai a nih hi. Ka va han ui tak che êm! May your soul rest in peace !
– Nu Rinpuii Bangalore
Ruati hian tourism hi Bangalore-ah a training zo a, Mizorama tourism lam hmasawnna kawnga a hma lâk hi a chhuanawm tak tak a, business atanga thlir pawhin nula vengva, mi dik, nun zahawm leh ram leh hnam tana thahnemngai a ni a. Culture lam atanga thlir pawhin amah avang hian mi tam takin Mizoram an hriat phah bâkah Mizote hawizauna kawngah sûl a su nasa a. Hetiang mi thiam bik, ram tana thahnemngai kan chan hi kan ram pum tan hian CHANNA nasa tak a ni. Ruati kan uiin kan ngai hle mai che.
– Lalrinawmi Ralte
Vanduaithlâk tak maia Maruatin chatuan ram min lo pansan thu kan hriatin hrehawm kan tiin kan ui takzet a ni. A hlim hmel leh a tawngkam kan rilruah a cham reng a, phûr leh thatho taka mi a puih peih rengna nun duhawm tak chu kan hmu leh ngai tawh dawn lo a nihhi! A nu leh pa leh a chhûngte kan tuarpui tak meuh a, kan tawngtainaah kan lo hre reng e.
– Rev Auva te nupa
Mizo nula, fel leh nungchang mawi chhuanawm berte zinga mi kan chân ta. Maruat, ka rilru a nâ-in ka va’n ui tak che êm!
– Engchhuani (Mami) Arunachal
A hmêl leh a pianken ena tlâwm tak, pai ropui tak si, pasaltha thangchhuah hawna hawng tur thawnthu ang mai ni ta Ruati hi… Mizo taka chawimawi phu ngawih ngawih ni mah sela ama mizia anga ‘Low profile’ deuh biru deuh maia a biru hlen tur hi – a nihna ni mah se a kuhmûmah tal thangtharte lo par vul sela, a dream leh a vision-in a tak ram a chang a ni mai. A lo beisei leh a innghahna thin Faa pawm thlaptu, mi sualte tleng faia Thianghlim fakima pawmtu hnenah muang takin a chawl mek a ni… a hmanhmawh lua a ni e.
– Mzvision Duhsaka
Krista tana rawngbawlpui duhtak Nl. Lalruattluangi, Hun lo taka thihna kut vawtin a man ta mai che hi hriatthiam a har kan tiin, i vanglai ni a va tawi lua êm! Lalpa rawng kan bawl ho chhûng khan zirlai tam tak i rawngbawlpuite min hnutchhiah asin. Mahse tunah zawng rauthla mai i chang ta si, i lei taksa chu phûmin awm tawh mah se i hlimthla chu kan hnenah a chêng reng tawh ang a, nghilh ni rêng a awm dawn lo. Khawvel thihna Jordan lui chu dai kaiin Lalpan amah hmangaihtute tana a buatsaih, riltâm, tuihàl, thih leh nat awm tawh lohna hmun vân khawpuiah chuan hnehna hla do chham chungin chawl hahdam la, rinawm taka arawng i bawlsak thin Lalpa ngei chuan lo kuangkuahin i tana a buatsaih nunna lallukhum hlân mawlh che rawh se.
– Beginners’ Deptt. Zirtirtute.
Mizorama Tour Operator leh ticketing ti hmasa pawl leh Mizoram Tourism Development Authority-ah Member ni lai a ni a. Hna tih tak zet leh thahnem ngai taka thawk mi a nih avang hian Tourism min promote pui nasa hle a. A sûlsutu zinga mi a ni tak meuh a ni. Minister, Officers leh Staff hoten kan ui takzet a ni.
– Tourism Department, Govt of Mizoram.

Advertisements

One thought on “Ruati Zoram-Rose

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s