VIETNAM TOUR DIARY

May ni 12, 2005 ah Aizawl to Delhi via Kolkata. Halt at Mizoram House, Teen Murti. A tuk mai ni 13 chuan ka passport Vietnam Visa dil nan Mr Joshi staff of NRRDA kut-ah ka hlan. Had orientation for Vietnam visit at NRRDA office. The meeting was conducted by Mrs Gardi Kaur Mishra, Director Finance, NRRDA who is appointed as team leader. After the orientation we were handed over all the required travel documents and cash in USD to meet all expenses. Ni 14 Delhi ah chamin May ni 15, 2005 chuan Delhi chhuahsanin Hanoi panin Malaysian Airlines flight MH 0190 at 11:30PM-ah kan thlawkchhuak. Kualalumpur kan tum phawt. An riprot thar chu a tha hle mai.

The KUL airport is huge, magnificent and seems to be new one. They are applying in their construction space frame technology and are a Civil Engineering marvel. To get connection to Hanoi flight we were transferred through MRT inside the airport. Boarded Hanoi flight and reached after two hours the next day i.e 16/5/05 at 8:30AM Vietnam Standard Time which is 1.5 hours ahead of IST.

16/5/2005

 Airport-ah USD 100 chu kan thlenga Vietnam Dong 1,582,500 a ni a heihi 1.58 million a ni a VMD chuan ka millionaire ta der mai tiin ka thian te kan hrilh chu kan nui dar dar mai. Rs 1 = 350 Dong ang vel a ni. Mahse an note te ber hi 500 Dong a ni. An note thenkhat cho Dong lakh khat te a ni thung. Tui bottle khat hi Dong 6000 to10000 a ni chu chu Rs 17 to 28 ang vel a ni. Beer nen a man a inang reng.

Representative of Indian Embassy and a Vietnamese interpreter Mr Long received us, with the Indian delegates at the airport. We were taken by bus to Hanoi that takes about 45 minutes and were put in a 5-star Melia Hotel.

Zam awm rum rum khawpin he hotel hi a pui. Keini ang hetiang hotel changkanga la thleng ngai lo chuan kilkhawr tak tak bih kuala enchian tur kan ngah hle. Kan inbual fai a kan inthiar chu an European commode chuan tui tlem te hian fai em em-in an flush fai vek maia. Japanese design commode an hmang, Mizoram tui harsatna a hman ve chi tak tur a ni. Kan thlek chianga, tui hi a harsa na a duhtawk hman tur kan nei, I renchem chuan kan lawm khawp ang tihte a lo intara. A bakah khawvel ram puma Green Brigade ho in ngenna an siam Card hring mawi em em chu kan chhiar leh a – “Green Crusade hi i zawm ve duh em? Hotel tina nitin bed sheet thlak nan hian sahbawn leh a sukna tui nitin khawvel puma hman tam dan te nikhat dana bed sheet thlak i  remtih chuan   Card hi pawnah lo khai la Towel ngai I hman nawn hreh loh tel bawk chuan Card hi Bathroom chhungah lo khai la, Green Crusade I zawm duh loh chuan Card hi Bath Tub ah hian I lo paih lut dawn nia” tih hi a lo ni a. Bathroom-a an thildah zozai hi nikhata han hman zawh chi a ni lo bawk nen Card chu Bathroom chhungah chuan kan khai ve zan ta maia.

Kan room chhungah chuan ei leh in tur tuihnai chitin reng an lo chhawpa. A then chu a man pek ngai a then chu a man pek ngai lo te an ni. Hei baka in duat dan hi a awm lem chuang dawn em ni ka ti. PWD IB room nuam ber nen chuan tehkhin chi pawh a ni lo, lei leh van ang a ni mai ka ti. 11AM ah Vietnam sorkar Ministry of Transport-ah meeting kan neih hmain darkar khat chu kan chhing sek teh ang ka ti a. Mumang nei hlek lovin ka mu ta diai diai mai.

Kan meeting-na hmun chu minute 5 a hmaah kan thlenga. An Transport Minister a theih loh avangin official lal berin min kaihruaia. Vietnam sorkarin kawng lama an hmalak dan hrang hrang te min han hrilha zawhna hunte an hawng bawka. An ram leh India chu hmasawnna kawnga in finchhuah tawn zel a duhthu leh India ramah pawh IT lam buaipuitu te an thang ve mek thu te a sawia. Ka zirte –

  • Vietnam ho hi sap aimaha punctual an ni.
  • PMGSY (Rural Connectivity) hmalakna Prabhakant Katare an a present.
  • Zawhna vawi thum ka zawt
  • Chhinchhiah chi te :
  1. Funding 2-3-5 (Commune-Province (State)-Federal) Commune hi khaw inhnaih rorelna khata dahkhawm; khua 5 atanga 40 te pawh a huam thei.
  2. An hmalakna lian tham reng reng ah khawvel changkang tawh te pha ngei turin Global level-a lang tham Consultant for Survey/DPR/ Supervision/Qualitiy Audit/Procurement FIDIC document deuh vek an hmang.
  3. 1993 liberalization ve chauh, Chinese in kum 1000 an awp. France in kum 150 an awp. North leh South Vietnam an indo an inzawm leh. An lal (King) an ban 1945 ah. Communist ram an ni. America an do leh. Hnam hrat khawkheng huaisen an ni bawka, an economic liberalization hi a true spirit in an apply.
  4. Fund an hmuhna langsar zual te : World Bank/ADB/ODA Canada/JBIC/DFID
  5. Infrastructure ah chuan India hian ka kal tawh chinah chuan kan pha lo ah ka ngai.

Official hoin lunch min eipui zawhah Vietnam Roads Authority ah an meeting 3PM atangin kan chhunzawm leh nghal. Chhinchhiah tur te:

  • VRA hi Nodal Agency for all roads, Motor registration, Driving license issue leh overloading control tu, safety, roadside plantation and beautification,
  • VRA hian pilot project in province 2 ah Roads Inventory Management System an ti zo. Hetah hian kawng chungchanga pawimawh zz data an dah vek. AutoCAD leh MS Access an hmang. An kawngkawi Radius te Transition Curve detail leh item hrang hrang man zat te, leh repair an tih hun leh senso zat engkim mai hriat tul chu he an data management ah hian an thun vek. Mihring base nilo System base management tih hlawhtlin an tum hle mai. Keini ve a awm a fel leh hna a tha a hnuah mi fello an awm leh a chhe leh mai.
  • VRA hnuaiah hian PDOT= Province Dept of Transport (state PWD ang) hi an awm.

Kan thlen zan hian Sa ei leh eilo kan inthliara. Vietnam pana India kan chhuahsan kha nimin mai ania Mizo chaw leh bai diktak zawn hi kan tum lo mai mai khawpa. Seafood lam eiturin kan chhuak ta hal hal maia. Luipui kamah outdoor (rooof a nei bang a neilo)  live music ngei mai awmna ah kan va kal ta. Thiam leh thiam lovin sap hla chu an sa lo khawp. Mahse an hla thluk te han ngaihthlak chuan pop music a ni tih chu kei mimawl pawh hian ka man ve maia. Mi lah an lo tam hrep. Kan interpreter in kan ei duhzawng te chu min han order puia – Tuifinriat chakai chi hrang hrang, kaikuang a nungchunga a Kg a thlan nge kan duh an dah vawhsa a sawisen a ni lo dulhmul khat phaurin zuk ei ve tho ia. Chopstick hman tluan zak ka tuma kaikuang leh chakai einan erawh a har hle. Chakai hi a chehna min rawn chhawpa kaikuang erawh kan inkheh chawpa. Chawtani chi hrang hrang hi toothpaste anga hmehchhuah tur hi an han chhawpa a then a thak a then sawhthing rim nam, mahni ka in a duh chu kan inhre chawp ve mai. Beer leh thildang in tur lah chu a tam hle inrenchem vangin ka in ta miah lo!!! Tlangval hmeltha tak Mizo tlangval ni mai awm a ngo deuh hlek ang a zai zawh chuan nula zei hmeltak hi a han zaia (Ngengpuii han tih mai awm tak a ni) kan thianpa Sardarji chu a lo hmu vak ngai lo nge zai pahin Rose an rawn pe ta hnap mai chuh – kan thawm a ring hle mai. Mahni ram a ni lo tih pawh kan hai hman thelh a ni. El euha kan ei hnu chuan (in tel lovin) kan thlenna hotel Hanoi ah pawh an chung en larh hotel chu kan pan phei leh ta. Rin aiin chhun lama traffic te a tawt tehreng nen zan dar 10:30 velah chuan a lo thawl hle mai. Kan zawt chianga Vietnam ah chuan business and office hrs hi zing dar 8 ah an tana. Lunch break hi 11:30 to 1:00 an neia, tlai dar 4 ah an banga zanah hmatakah an mu tlangpui hi a lo ni a. Zanah chuan Five Star hotel khum nuam takah chuan mut zai kan rela. Ka thiante  (Indian delgate) te kan call-a Vietnam mobile phone (Sim Card) lei hi hotel phone hman ai chuan a man zawk an ti a leiturin Lobby-ah chuan ka zuk chhuk ve a Dong lakh 2 man chu kan lei ve a, chhungte zankhat biak hnu chuan a balance kan check a a bang tlem hle mai. SMS char char mai tur anih hi ka ti a. Min awimu tuirn BBC leh CNN te kan ngai thla a, khawlum leh humid em em ah vawt ti lek lekin rizai sin chuan ka muta a. A nuam aniang mumang ka nei miah lo.

China leh Laos ram dep an Province khawpui Son La panin

380Km lai a ni a kan zinna lehna tur hi.  Kan hotelah American Breakfast a tui tinreng mai Buffet a kan ei hnu chuan Hyundai Bus ah Air Condition nuam takah kan chuanga. Ministry atangin interpreter hmeichhe fel tak leh VRA-a an Senior officer ten min hruaia. An ram hi 80% tlangram a ni a 20% hi phairam a ni. An ram hi a lo kheng ve hle a, Jungle War atan chuan duhthusam a ni mai awm e. Ramvachal tan lo chuan kal zung zung chu awlai bik lo tak a ni. Chinai lung an ngah avangin an tlang thenhkat chu a filh deuh thuau maia, a mawi lehling hle mai. An Highway ah kan tlana, kawng kamah hotel vel a ther ve sup mai (Mizo style deuhin) . Han en reng rengin 12Ft frontage dawrah hian a hnung leh a chhawng chungah a dawr neitu te an cheng nghal tlang pui. Hmun tinah inthiarna a fai tha hle a, tui pawh an nei tha hle zel. Chinese ho ang chiahin Green Tea hi an in reng mai a. An no erawh naupang inkhualtelemna tiat lek hi a ni. No ¾ in chu a har lo hle. A dai an pawisa lo khawp bawk. Thingpui ina chawlhna kan duh kan sawi laiin khawte tak te ah kan chawla, thingpuidawr 1 chiah nei ang chi ah hian. An pa ho hian Beer an lo inkhawm tal tala, anmahni siam ngei kha. Kan thiante kawlhrawng deuh chuan an han inpui thuai bawka. Kan thian thenkhat riltam deuh chuan chawei mai an rawta, min hruaitu chuan eina hmun mumal deuhah I ei ang u an ti a kan kal leh ta a.

An kawng a tha si Car tan speed limit 60 Kmph an phal laiin Bus tan chuan 40Kmph an ti a 80Kmph pawhin kan tlan thei tih a hriat reng mai sia. Mahse a khat tawkin Police Speed check tu hi an lo awm zela. An Police te hian silai an keng lo mahse an han zah dan zia hian ngaihtuah an tithui hle. 160Km vel kan tlan hnu chuan Lunch kan ei ta a. Sa eimi zawng kan buai lo hle. Vegitarian ho erawh chu sawi theih piah lamin an buai a ni. An thil han chhawp reng reng hi Sa leh a kaihhnawih an han chhawp hmsaa kan eife hnuah Sa chidang an han chhawp leha, chumi hnuah tlak ang chi  leh soup te an chhawp leh hnuah Rice hi a tawp nan ber zu han chhawp chauha. An ei ah hian Tel a tlem hle, Chinese style mah nise Mizo duhdana tak nguk silo hi a ni. Keini pa kawchhe tan pawh kan ngeih dawn tih hi a hriat reng mai. Kan thian thenkhat ten Waiter ho chu “Hey tih leh kut zaizirin an han huia” heihi an ni chuan an duh vak loh chi leh polite lohna a an ngaih a ni. Mahse nuisang reng mai hnam an ni a, an lungnihvakloh pawha nuisang chi an ni an lo ti, a dik hmel hle in ka hria.

Chawei kham chu kan kal ta zel a, an kawngah chuan 100m dan zelah hian chhinchhiahna pillar an daha, a number an pe zel bawka. A hlauhawm turah chuan thir tlawn te an dah bawk. Road Safety lamah chuan zirtir an ngai lo hle. Kawngtluanin Centre line leh a sir tawn tawn hi rawng var an hnawih chhuak vek mai. A khat tawkin kan kal zelna tur information an tar zel Mel post nen. Abakah kawng chhuk leh chhoh dan 6% up 7% down 10% up 200m long tih ang chi te. Vawikhat kalnan pawh speed lak leh break uluk ngai lai chu hai tur a awm der lo. Tlangram deuh veka tlan kan ni, an side drain han uluk dan chuh – keini aiin ruahtui an dawng tlem si, an tlang hriam dan erawh a khawi nge chhe zawk ang ka tih reng lain tlangsang lamah phai zawl leilet awmna te chu kan han tlan pel leh zawk bawka. An ruam hi keini ram angin a thuk ve vak vak lo.

Lawi (Zoram lawi nen hian breed khat an nih hmel hle;  an bawng te chenin a te ve fek fawk hle mai) nen hian chuan an hnam awmtirh atangin an inthian thin anih a rinawm hle. War Memorial kan tlan tlang zeuh zeuh mahse kan ding hman lo, dinchilha han belhchian pawh a chakawm hle thin mai. Zing dar 9 a chhuak kha tlai dar 5 ah chuan an Province capital Son La chu kan thleng ta a. An Hotel 7-Storey ah kan thleng, Hanoi a kan thlenna nen chuan kan sit hle maia mahse Card Key fully AC leh computerized kha a ni ve tho mai. Khawpuia an tih chu an thingtlangah pawh an apply ve zel ani maw ka ti maia. Tlang a lo sang tana a lum nepa an hot water lah chu duh ang anga single levera a control khan duhtawka in shower hnuah pawh daih lai reng a nei lo. Salt Lake Mizoram House ai chuan felfai hle ah ka ngai. Dinner eiturin Restaurant kan pana kan thiante Vegetarian ho chu an buai leh hle, keilah chu Vietnam chaw chi hrang hrang test ka tum hle mai si a. Restaurant nghaktu ho lah chuan min hai deuh reng bawka. An hriatthiam turin mahni inkawk va pah hian “No Vietnamese, India, Mizo near Myanmar” kan ti a, an lu bu nghat nghat chung hian “OK OK OK” an han ti a.

18/5/05

An state PWD ho chu  PDoT (Province Dept of Transport) an tih office ah kan kala zing dar 8 chuan an lo kim thap tawh maia. An conference hall-ah chuan meeting kan neia. An state chhunga road awm reng reng chu an thuneihna hnuaiah a awm vek mai. An hotupa ber Dinh Duc Chu an kan meeting a kaihruaia. Ho Chi Minh a piancham kum 115 na a lo ni bawka Uncle Ho-a thianpa Nehru-a ram atanga Indian delegates te chu chibai min han buk te te a, a hote min han introduce bawka. An province 14000 Sqkm (Mizoram chanve tiat) a zau ah Commune 827 an neia, an kawng neih zat min han hrilha:

  • 572 Km National road
  • 589 Km State Road
  • 1214 Km District Road
  • 2800 Km Commune Road (Rural Road)

Kum 10 kalta khan an province Road Network Master Plan an siama, Consultant te ruaiin an siamthat leh mek thu min hrilh bawk. Commune Road an maintain nana an sum mamawh hi kawngin a khaw tlawh ho khan sum an thawh khawma, a bak chu District leh Province ten a pe bawka, chung an sum hmuh chuan an kawng te an maintain thin a ni. Pawisa thawh thei lovin a tha in an rul mai thin. An mahni kaihruai turin, PDoT atangin Engineer te an va depute thin. Leimin nasa leh tuiliana in a tihchhiat erawh an Central sawrkarin tanpuina a pe. Hat Lot Commune hnuaia kawng an maintain te kan en hnuah  an office hi kan tlawha, building tha tak Primary School pangngai tiat vel hi a ni.  An kawng te hi keini ai chuan an maintain tha hle mai. An kawngah hian Commune ho hian over loading an khap tlata, an side drain nen lam an thlo fai ni maiin ka hria. Pot hole hmuh tur a awm lo tluk a ni. Kan kal pah hian Tea Garden leh Coffee Plantation kan hmu nuala, mimal ta zau tak tak te pawh a awm tih min hrilh bakah Coffee atang hian nasa takin an dinhmun an chawiakan thu te an sawi bawk (Sumchang thlai a hma an lakdan chu kan la ziak ang chu).  Thimfe hnuah Son La ah kan kir leh a. Mut hmunah Communist hi thiltha tih duh hotu an neih chuan implement an awlsam bik hle dawn anih hi, Democracy ai mahin a that hi ka ti.

19/5/2005

Kawng ngai bawk zawhin, Son La atangin Hanoi kan kir leha, Hotel dang a hma a kan thlenna ang 5-Star level-ah kan thleng leha.  Thlen veleh kan inbual faia, thil tlawmna hmun an tih an Lake bulah ka va bazaar. Kan kalhma a mi min hrilh lawk angin thil reng reng man hi a zahve vel atangin kan dawna, Calculator hi kan in hmanchhawk zak zak mai a ni. A nuam ve hranpa khawp mai, mahse 20% vel aia tlawm chuan ka si thlu thei der lo nia. Silk lam thawmhnaw chi hrang hrang, thi leh bengbeh chitin mai leh handicraft lampang ah chuan an lo thiam chungchuang hle ka ti mai.  Handicraft phei hi chu a village tawp tawpin thil siam bik hi an lo nei a lo nia. A tlawmin an nalh hle mai. Kan nu te chu kal ve se lei tur an hriat hle dawn hi ka ti a. Thiam hnang leh, mau atanga thil an siam ho phei chu Mizo te min train sela aw ka ti.

Kan hotel ka haw phei chu sap hla hi an lo sa a, kan va lut chu Phillipino band an lo zai hi a lo nia. An thiam hle mai. Thutna ka rem fel hnu a ka tlangnel deuh hnu chuan stage atangin khawi lam mi nge ka nih tih min han zawta kan sawia a awih lo hle na a Myanamar hnaih Mizoram atanga kal ka nih thu kan hrilh hnu chuan Hindi hla kan sak sak ang che a ti a, mawi deuhin a sa a, a hla lah chu ka hriat ngai a ni lem lo naa, thuthmun atang chuan lawmthu te kan hrilh a.

20/5/2005

Ho Chi Minh a thlan ro Mauseleum ah kan kala, a chanchin te ziaka kan chhiar chian hnu chuan ka ngaisang sawt maia. Ho Chi Minh chu tawih thei lovin Russian thiamna hmangin darthlalang chhungah an daha, a hmel leh tisa te leh a khabe hmul te chu a damlai ang chiah in a vawng nung a ni. Kum 40 zet a thih hnu in a liam tawha, a taksa an vawnthat dan chu ka rinphak bak in a tha a ni. A chenna in leh office zawng zawng te, a laltin leh lehkhabu hlui te pawh mipui enturin an dah vek mai. Holiday anih vang nge ni, a kum 115 piancham kum anih vang nge entu kan tam hem hem hle mai. An Freedom fighter Independence puangtu chu India ramin Mahatma Gandhi kan ngaisang ai mah hian an hlut emaw chu aw ka ti. Entu mipui mihring sing tel fe ah khan, Vietnamese mi kha 90% chu an tlin ka ring.

21/5/2005

Hue city Vietnam ram laili an lal rorel laia an khawpui panin Ha Noi chu Vietnam Airlines in ATR aircraft Lengpui-a thlawhna te tum thin ang chi ah hian kan thlawh chhuah sana.   French hoin an awp laia Hotel an din, kum 200 dawn hnua an cheithat French Architech renchem nei miah lo a an design 5-Star hotel atana an cheithat Hotel Saigon ah kan thlenga. A bul lungvawm phak mai kha Perfume River an tih, Tuiruang aia lian mah chu tourist hip thei chi hrang hrangin an chemawia a tui lah a fim kuk mai si a mawi kher mai. Kan hotel thlenna lobby ah chuan Silk puan background a hmagin artist ten thuimawi an lo tarchhuaka, keilah pek chuan an painting mawi zia saw I va lei the ang u ka tia, kan belhchian fe hnu pawhin painting hi ang ka la tihle tho. Ka room luah chu a lian tha bawka, veng lian tak YMA Committee thlengzo tur zeta lian a ni. Hmanlai Europe pa ho hi chu an va lo ropui riap riap em aw ka ti a.

22/5/2005

Sunday hian office an kai bik lova, luipui kam beach leh an Industrial khawpui lian pakhat Da Nang Km 110 zeta hla panin zing breakfast zawhah Bus nuam takah kan kala. Japanense Contractor ten an thawh zawh hlim 6.280Km a thui tunnel kan tlan tlanga. Tunnel chhung an design dan leh chhiat tawh awm thei palha an inven dan safety measure hrang hrang video leh computer hmanga an monitor min entira. A pui tiap tiap hle mai. An Industrial Zone te kan thlir thuak thuak hnuin French hoin Archeology Museum an Dinah kan kala. Vietnam ram hi Hindu Mission te pawhin kum sang fe liamta ah khan hmun an lo khuar tawh tih a hriat hle mai. Tam Dynasty bul intanna a lo nih bakah brick leh tyle an rawhthiam dan leh an char ngheh thiam dan hi Research beitu tamtak te maktih a ni. Da Nang hi National road hlir zawhin kan chhuahsana, kan kal chho kan chhoh hnuah,Da Nang khawpui mawi em em a a lanan leh America nen an indo a America 7-Fleet vel lo luhna Deep Sea Port te kan thlira kan chhuk leh ngar ngar maia. Kan inthleh kan inthleh hnuah Lagoon bakah luipui in tuifinriat a finna mawi tak tak kan tlan pel leha Beach a an Resort-ah lunch kan han ei mai chu a vai hnem theih hle mai. Tlaiah ruah a sur ve a mahse a rei lo, Hue hmun hi an rama ruahtui tamna ber hmun 3000mm chunglam ruahtui tlakna a ni ve. Mahse an kawng chu a hnum em em mai lawi si. Kawnga tuitling hmuhtur awm lovin an kawng drainage an titha anih hi ka ti rilru nauh nauha. Thim hlimah Hue kan thlenga, swimming poolah han chen ve ka chak viau na a, kan inbual fai hnu chuan Hue khawpui chu ka fangkual ta zawka. Tourist tamna hmun a ni bawk nen kan thlenna bul mai kha an fuankhawmna a ni bawka, kawng sira an restaurantah Vietnam chaw ngei kha ka eia a tlawm hle bawk si. A tuk programme turte inpuah chah hma turin thui vak vak zui ta lovin kan hotelah ka kir leh ta a.

23/5/2005

PDoT office ah zingkara meeting kan neih hnuin, kawng maintain lama an hmalak dan kan thlur bing deuh a. An Province statistics min han hrilh phawta :

  • 5000 Sqkm a zau chauh a lo nia Aizawl District tia vel a ni awm e.
  • District 8 ah an inthen a
  • Commune 144 an nei commune khatah village 10 aia tam an awm lo tlangpui.
  • Port lian tak 2 an enkawl tel 30000MT Cargo daily in an handle thei
  • Hue City hi mihring nuai 10 vel awmna a ni
  • National road 227 Km, Dist road 550 Km leh 2600 Km Commune road an enkawl mek
  • An province a hausak deuh avangin mipui pawisa thawh khawm hi 30% lai a tling kawng an maintain nan
  • Blacktop loha Gravel road chauh tih hi World Bank hoin an tihtira a tlo si lova a simthlak an ti hle. Heng kawng black top loh tamtak hi Commune ho in an pawisa in an black top.

Thuang Hnat Commune village 5 neiah kan kala, an Rural road ah chuan Culvert leh R Wall ah sum an sen hnem hmel hle mai. Nam Dong district road Km 38 lai kan zawh bawk. Kan kalna ah chuan Rubber leh Acasia hi an chin thlak thelh sung mai. An chinthlak thelh chhan ka zawh chuan tamhri an inkai pawh loh nana kan tih a ni an ti. Tlang sang pir deuh deuh a tam hle a a ngaw hring dup mai. Chhunah kan va kal lai hian villager ho kha an zawlbukah hian an lo mu dul maia, an chhun khawlum hna chawlhsan an lo nia.

Kan haw kawngah Pilot project-a Concrete road Steel reinforce leh bamboo reinforce hmang te, Lung phek  chher phah chunga concrete road te, Brick Soling chunga BT te DFID bultuma an tihchhin kan ena, Mizorama tihchhin ve awm takah ka ngai. Kan haw kawngah Ancient City an tih an lal ban hma a an Palace kan tlawha, an lal te pawh an lo ropui hle mai. An vanglai chuan nupui 140 chuang nei te pawh an awm a lo nia. An lal te hi France ramah 1945 vel khan an tlanchhia a tun thlengin an thlah te an la awm. Zanah lawng mi 20 chuan theihna kan hire a, Perfume river an tih luipui thianghlim em em ah  lawng chhungah Vietnamese Classical Music live in an play a duhtawkin seafood kan ei leh kha.

24/5/2005

Ha Noi kan pan leh hma in an King thlan ro kan tlawh zawka, Ha Noi panin Vietnam Airlines Airbus 320 in Hue chu kan han bye bye leh ta a. Kan thlenna hmasa Hotel Melai ah kan thleng leha, zanah Vietnamese Restaurant dik tak ah kan interpreter Long-a nen dinner kan eia, a la tui deuh deuh anih hi ka ti. An chaw leh sa ka ei ta malh malh hle a pum ngeih lo hi zu awm miah lo mai a mak ka ti hle.

25/5/2005

Transport Ministry ah Wrap up meeting kan neia, an General Director i/c International Cooperation in min ho a lawmthu te kan han inhrilh nawn hnu in introduction an han neia, Vietnamese ho sir chiah ah ka thu a, min han hai leh peka kan nui dar dar mai. Senior engineer 10 rual zet an lokala English a tawng thei sawih sawih pakhat chaih zuk awma a maw le.

Vietnam kan chhuahsan dawn ta bawka am takin kan bazaar ve tak kha. Bazar zawh hian tlai thimhlim flight a Kuala Lumpur pan turin Ha Noi kan chhuahsan a lo hun ta der mai. Vietnamese min kaihruaitu te chuan min rawn thlah leh thlap maia. Min thlah tu te nen chuan kan han inkuah vawng vawnga a lunglen thlak ve tep a ni.

TRANS – ASIAN HIGHWAY

Trans-Asia Road hi an hlawkpui hle a ni. 4 lane Highway a ni a, henglai kan kawngpuite anga Motor len na chin chauh Black Top a ni ve lova, a kawng  ruh chin ang ang Black Top vek (Wide shoulder )a ni. He kawng siamna ah hian Company 82 an inhnamhnawih a, a senso hi US $ 121 million (Rs. 545 Crore ) a ni. Hetianga kawngpui tha an han neih takah hian kum tin investment 20% in a pung ziah a ni. Chumi awmzia chu US $ 300 million (Rs. 1350 Crore ) anih tak chu, he kawngpui in a Cambodia a paltlang hnuah hian an sumdawnna leh Tourism-ah te nasa takin hma an sawn phah bawk a ni. Trans Asia Road avang hian Export–ah pawh nasa takin hma an sawn a, Kum 2004 atang khan 26 % in an export hi kumtin a sang chho a ni a, chumi awmzia chu US $ 72  million ( Rs. 320 Crore ) in a pung tihna anih chu.

Asian Development Bank sum hmanga Greater Mekong Sub-region hmasawnna Programme hian Mekong Lui luan tlangna ram pathum Vietnam, Cambodia,Thailand te bakah Myanmar leh Laos-te a huam vek a, hetianga kawngpui a lo inpawh tak vekah hian heng ramte hian  ramri an kan na apiangah Port of Entry Visa Ni 30 chhung atan an inpe a, a tul dan a zirin awlsam te a pawhsei theih a ni. Bangkok atanga Kualalumpur hi tunah chuan darkar 6 tlan chauh a ni ta a, Kualumpur leh Singapore inkar hi darkar 4 tlan chauh a ni ta a ni.

Vietnam ram chhung bikah Trans Asia Highway hi 80 Km a sei a ni a, hei hian an khawpui lian ber (Business Capital) a paltlang nghe nghe a ni. An kawngpui te hi han tha lo zia a ni lo tih a lanna chu kawngpui 80 Km siam nan hian ADB-ODA sum US $ 145 (Rs. 652.50 Crore ) an seng a, 1 Km ah Rs. 8.00 Crore vel an seng tihna anih chu.

POWER LAM VE THUNG

An ram chhim lam hi a ram hausa lam a ni a, Power pawh an intodelh Hmar lamah hian Hydro-Electrict lamah hma an la nasa hle a. An luite hi China leh Laos atanga luanglut an ni hlawm a, Tuiruang Lui aia lian fe fe a awm thluah mai, an ram 80% hi tlangram chhengchhe ve tak a ni a. 3000 MW Project ang chi Mega Project an nei nual. An ram lui te hi ruahtui ring, Vur in a chawm ang chi an nih lemloh avangin kan ram lui te ang bawkin Thalah tui a tlem ve thin avangin Thermal Back-up an ngai. Thermal (Gas Fired Power Plant ) an hmang ber. Thermal Back up hi Chhim lam atangin 500 KV National Grid kaltlang in an in pe chhawng thin. Grid Transfer hi Shut down la lovin an in pe chhawng mai thin a ni.

An ram khawpui Ha Noi ah pawh Delhi te ang tho Power cut an nei ve fo tho mai, mahse Office te Hotel te leh Shopping Complex leh Restaurant te chuan DG Set back-up an nei deuh vek a ni. Residential Area-ah chuan Ha Noi-ah hian an in thim chhawk ve zak zak tho a ni.

Ha Noi hi phaizawl khua Mihring nuai 30 vel awmna a ni a, an khawpui awmzia chu Aizawl tiat vel khaw engemaw zat inhnai te te inzawmkhawm a ni a. Khawpui lum tak Kolkata ang a lum Humidity sang bawk si anih avangin Portable DG Set hralh a tlak hmel hle a ni.

India ram ONGC leh an mahni Vietnam Oil and Gas corporation ten Gas an hmuh belh zel avangin Power-ah chuan an intodelh thuai a rinawm.

THALAI  LAM  NUN

Hnam inchei uluk leh invawng fai an ni a, an hmel pawh a tha tlangpui in ka hria (kan thangrei tawh deuh vang emaw ni ? ) Mizo te nen pumruaah chuan kan intia tlang tawk viau a, a ngo erawh an ngo zawk deuh. Budhist Sakhaw bia an ni a, an sakhaw vawnin an nun a thunun tih a hriat a, an nun nemin an polite em em a, hlim hmel an pu reng emaw ni tih mai tur a ni. Fashion-ah pawh an sang a, Economic Liberalisation avangin Multi National Company an lut nasa. Thalai tan hna tau a tet a, hna an thawk nasa hle a, an mamawh leh duhzawng lei thei turin an intodelh tlangpui. Korean Celebrity leh Western culture in thalaite a influence nasa. Premier League-te American Idol leh Korean Serial te kan Mizo thalaite ang tho in an tuipui ve hle. Beer te Wine te hi chu zu ah an ngai lo ni berin a lang a hmei a pa in an in vek ni tur a ni. Tui leh Beer man a in ang deuh reng. Thalai zingah Class hnih Beer leh an Local Vodka in chi leh a neinung deuh Wine in thei Class an awm. In tihhlim nan Pub, Karaoke leh Disco an uar hle. Communist sawrkar an ni na a heti lamah hian an thikthu a chhe hran lo tih a hriat theih. Restaurant a chawei chhuah hi an ching hle bawk. Thalai ho hi za ah za in ziak leh chhiar an thiam a College level thleng hi a tam ber an ni. Chuti chung chuan English a lar lovin an thiam lo veleh chhawng hle a ni. Kut themthiam na lam an ngaisang tih a hriat a, Art lamah an kal nasa hle Moped hi 90% velin veivah nan an hmang. A sing a nuai tel hi an tleh del del mai a ni, inchhawng sang atang chuan fanghmir ka te pawh an ang ka ti. Petrol leh Diesel hi India ram aiin 50% vel zet in a tlawm.

SUM CHANG THLAI

Vietnam pan tura kan chhuah dawnin Er. Ramhluna, Adviser to CM inah ka leng a, Vietnam-a kal ka chak lem loh thute leh NE India State ang vel lek tura ka ngaih thute ka hrilh a. A ni chuan, “Hei Australia atangin ka lo haw hlim a, Australian Consultant kan rawih te Vietnam-a kal tawhte nen kan inkawm a, hma an sawn zia leh nuam an tih thute min hrilh asin” a lo ti a, ka phur phah ta deuh sawt a. “Coffee hi Vietnamah an ching nasa khawp mai a, khawvel No.1 Brazil pawh hi Vietnam ho hian an umpha tep tawh a nia, I han zin chuan an hlawhtlin dante rawn chik I tum dawn nia”, min ti a. Coffee chin hi Mizoram intodelhna a nih theih thu Major Thangkima (Mizopa hrat khawkheng) titi; U Biakenga (Fam), Chanmari West kan ral tumin, haw nachang hre lo lekin ka lo ngaithla tawh a. A bakah a hnu deuhah Lengte ka kal tumin a coffee huan a enkawl dan leh a nihphungte ka zu hmuhpui ve tawh bawk a. Chumi phur thut chuan ka huan ngaw thelh thuau karah ka phun ve a. “I huan hi a ngaw em maia I coffee chin hian ni hlim an mamawh chung hian nisa pawh an mamawh ve tho a, I huan ngaw I thawlh thelh loh chuan rah an chhuah tha thei loving”, tih thurawn ka dawng a. Ka huan ngaw han kih thawl chu ka ui bawk si a, chhuanlamah District Council hun laia Aizawl dai ngaw khep khup mai kara thing tuah tur kan han fawm khawm, forest guard hlauva kan tlan chhiat thinte min ti hre chhuak a, tunah lah lal tak tak an awm khup si lai hian ka coffee neih that duh vanga ka huan ngaw thiah te chu an phal lo tawp ang tih chhuanlamin ka coffee phunte chu rah an chhuah that loh deuh pawhin a zar zo tu nungcha tal an lawm ang chu ka ti a.

Thingtlang kawng (Rural Road) lama an hlawhtlin dan zir tura kal tur kan nihna ai mahin coffee lam chuan ka rilru a la ta hle mai a. Vietnam ram chhungah 1500Km chuang lai kan tlan kual a, kan kal chhan baka zawhna ka zawh ngei ngei ber chu ‘coffee’ a ni ta zel a. America sipaite chet hleihluak nate chuan ka ngeng a chhun mang hauh lo mai a (ka khawngaih lo ni lovin), Mizoramah anni ang hian han bei ve ila, kan thangthar thalaite hian han atchilh ve tak tak mai sela, pa te pocket money dil dil lovin, “Ka nu, ka pa, New York Coffee Auction (commodity auction) naah ka hlawh tha deuhva, US dollar 1000 hian I duh zawng zawng tih nan lo hmang ve teh”, ti a sawi tur thalai taima tak tak an kat nuk dawn si a. Mizoram tan coffee hi chu ka U Robert-an ‘thing anchhedawng’ a tih ang chi hi chu ni theiin ka hre lo a ni.

A hma lama kan sawi tawh ang khan Vietnam ho hi kum sang tel teh meuh mai leilet leh tlang ram lo a nei a, buh ching an nih avangin an culture an hriat hlat theih berah pawh hian an lo neih naa lawi an chhawr tangkai zia te hi a ni a. Hun a lo inher zel a, buh chin vak vak ai chuan sum chang thlai chi hrang hrang lamah tan an la nasa em em a, heng avang hian buh an chinna thin hmun hi a zim telh telh a, chung buh chin ai chuan coffee lamah te hma an la ta vak vak mai a ni. Tun kum li kal ta, kum 2000 atanga 2004 inkar khan buh an china thin 338,000 hectare-ah hian sum chang thlai an lo ching ta zawk a ni. Buh chinna hmun an neih zawng zawng hi 7,666,000 hectare atangin 7,328,000 chauh buh chinna hmun an nei ta a ni. Buh hi chu khawvel ram hrang hrang atangin an la lut a, India ram atang pawhin ran chaw atan tam lai buh uih ang kha an la lut teuh mai. Sum chang thlai a intodelh an tum dan han tarlang ila:

  • Buh an la china hmunah hian buh chi thar chin, fertilizer tha pek ngei, tui kawng irrigation chum lo chat lova pe thei tura hma an lak avangin buh china hmun an zim a, an thar erawh a pung thung, 4860kg (tin 600 vel) hi 1 hectare (tin 2 leh a chanve hmun vel) ah an thar a, chu chu tin khat hmunah 2000kg ang vel (tin 250 ang vel) an thar tihna a ni. Hei hi thar hlawk an inti hle.
  • Sa ei nasa hnam an nih avangin ran vulh lamah tan an la nasa em em a. an buh hmun tam tak hi vaimim hmunah an let a. An vaimim thar hi buh an thar ai chuan tlem hle mahsela a kum telin vaimim hi an thar pung telh telh a, an thar punna ringawt hi kum tin 3,50,000 tonne chawh rual theih a ni. Heti chung hian ran chaw atan ram dang ami an la chaw lut (import) nasa hle.
  • Market chiang sa, industry lian te’n an lei zawh nghal zel duh chi chin an uar hle bawk. Chungte chu:
    • Rubber
    • Acacia (gum siamna)
    • Pepper (thinghmarcha)
    • Cashewnut
    • Tea
    • Coffee
  • Market chiang sa ve tho, short term atana industry din pui theih thlai an tih ho chin an uar hle bawk a, chungte chu:
    • Bekang
    • Fu
    • Cotton (La)
    • Thei ei chi hrang hrang; serthlum, theihai, lakhuihthei, theifeihmung, limbu bial chi leh dawnfawh te an ni.
  • Ramngaw nei tha em em chung hian thing leh mau, sumdawnna a hman tur chin an uar hle. Khawvel ram pawna an thawn chhuah (export) nasat deuh deuhte han tarlang leh ila, tichuan coffee lamah kan kal tawh dawn nia:
    • Coffee
    • Rubber
    • Pepper
    • Cashewnut
    • Thingpuife
    • Rice (Buh)

Coffee History: French-hoin an tihhmuh atangin kum 1857 leh 1993 inkar khan mawlmang angreng takin, thang em em chuang si lovin coffee hi kum 140 dawn an lo ching a, an thiam ang tawk tawkin coffee chin dan an zir chho naa, hma nasa takin an sawn hran lo.

Khawvel mite mak tih khawpin coffee-ah an hlawhtling: Robusta coffee an tih, tunhma atanga an lo chin thin variety kha hlawk zawka thar tura enkawl dan (yield) mithiam (consultant) ruaiin an hriat belh zel a. A bakah coffee rau rauva tui leh man man zawk arabica variety chu kum 1993 atang khan chin an uar tan chhova. Coffee hi kung khat rau rauva an thar kha a let li in an thar thei a, coffee chingtu an pung bawk si a, coffee an thar hi kum tin a let za laia an lo thar tam takah chuan coffee kaihhnawih industry, thalaite eizawnna nuaih tel siamtu a pung hluai bawk a. Hetiang hian Vietnam ho hian engtinnge an tih ka hriat theih chin chinte tarlan tum ila:

  • Coffee chin nan hian lei sen, lei tha leh lei tak thuah chhah ram hi a tha duh an ti a. Tin ram lum lam leh boruak hnawng tam a ngeih an ti bawk a. Heng ang ram hi mithiam (soil and agricultural scientist)-te ruaiin khawiah nge coffee kan chin ang tiin hma an han la phawt a. Khang hmunah khan robusta coffee chin tur an tihnaah chuan khawng the tawhin thingtlang mite chu an chin tir a.
  • Heng coffee an china turah hian coffee chi (seed) scientific taka sawngbawl, certified seed supplier, ISO Certificate nei ngat te’n man lovin an pe a, a bul an tan atanga an rah thlenga an enkawl nan kum tin sawrkarin kan tanpui ang che u an ti a, an pe ngei bawk a.
  •  A rah chhuah a pun theih nan mithiamte’n an enkawl pui reng a. A bakah an coffee rah thar nisa a pho ro nan an mamawh hrang hrang an pe bawk a. A coffee rah a pun theih nan tui pek a hlawk a ni tih an hriat chinah, coffee an par tan tir a, tui pek tur ang chi, water harvesting leh pumpin irrigation an tih hnuah tunlai hian drip irrigation-a tih chhoh an tum leh ta zel a. Tin duat em em in fertilizer an pe bawk a.
  • Robusta variety hi an tlang ram laihawl, 500-700m vela sangah (altitude) an ching ber a, kan hriat thiam dan turin Lengpui ramte, Kolasib, Thingdawl ramte anga sang vel ram. Coffee nursery siama enkawl chu an ‘blackbelt’ ve na lampang tak a ni.
  • Hmar lam ram tlang sang lehzual, 1000m chin chung lam, ruah tui (monsoon) hmuh thatna si ah Arabica variety an ching thung a ni (Coffee chin thlangtute’n Zampui leh Burma ram atanga a chi an lak, certified ni miah lo anga malsawm lo taka pek ang ni lo hian).
  • Coffee an thar tam ta tih an hriat chinah khawvel sumdawng hausa (foreign investors)-te chu coffee chi hrang hranga siamna industry an din tir a, coffee-a sumdawng hausa tawh chuan a hralhna kha an hre bawk si a, kum 2000 hma lama coffee man san lai ber kha an thar tam lai nen a in nang bawk si a, an hlawkpui hle a ni.

Harsatna:  An harsatna tawhte I lo tarlang ila:

  • Coffee an thar tam si a, an lo inpuahchah tha tawk lova, coffee tih rona (drying yard) an indaih lo. Tunah hian power leh khaw thiltihtheihna hmang tangkaia ur rona lam an uar tan hle.
  • Robusta man a tlakhniam lain Arabica man a pung a, an duh angin Arabica variety an ngah tawk lo.
  • Khawvel market dap zo tur mithiam an ngah tawk lo.
  • Coffee international market-a rate san vak hnua tlak hniam leh vak ang chite internet kal tlanga coffee chingtute hriat tir zung zung theihna lamah Brazil ram angte pha lo an inti hle.

Coffee-a hmasawn zel dan tur (strategy):

Tunlai hian coffee man hi a tlahniam fu a, Vietnam-ho vanga international market rate pawh hi tlahniamah mithiamte’n an sawi thin a. Chuti chung chuan coffee atan hian indopui an puang ve ni berin a lang, hmasawn zel an tum tlat. An tum dan tlangpui han tarlang leh ila:

  • Quality improvement: Coffee rah lawh chungchangah te, a pho ro dan te, a dah that dan te leh industry-a an sawngbawl dan te, tunlai khawvelin an tihdan changkang ber ber chawk luh
  • Senso (Production Cost) tlem zawka thar chhuah
  • Khawvel market demand ang zel a coffee siam chhuah pawh tihdanglam
  • Scientific, modern bawksi leh tlo zawk tura coffee siamchhuah leh thawnchhuah (export) lama hma la thei tur thangtharte train chhuah
  • Thingpui in hnam an ni a, coffee an ram mipui maktaduai sawmriat chuang coffee in mi tih pun.
  • Tunah hian 1 hectare (tin hnih leh a chanve hmun)-ah 4000kg te an thar a, 5000kg thar tir an tum. Tunlai hian international market-ah coffee rah hi 1kg ah Rs. 35 a ni a, chutiang rate-a chhut chuan tin khat hmunah Rs.56,000 vel an lei tihna a nih chu (India ramah hian chawhrualin 1 hectare-ah 1000kg vel kan thar ve chauh a, Bualpui vela coffee plantation-ah khuan 1 hectare-ah 2000kg vel kan thar thei a ni). Tunah hian Bangalore Coffee Auction Centre-ah chuan Arabica variety hi 1kg ah Rs.100 vel a ni.
  • Vietnam rama coffee rah pho ro kan han tar lan khi robusta variety man a ni a, Arabica variety man hi chu a let in a to a ni.
Advertisements

6 thoughts on “VIETNAM TOUR DIARY

    • A hlui deuh tawh naa – a hlui lo a thar zel alawm i ti mai ang. Ka zinlai khan rilru zz hmangin midang share turin ka zin ani ber. Hetia chhiar hlawh vaklo a a awm hi ka ui a kan dah thar leh anih hi. Ngaihnawm in tih chuan ka lawm hle ani

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s