NGOPA HAWRUNPUI 2013

Banner1

Ngopa hi kanu leh pa seilenna khua an ngaih tawp theih loh ani. Ngopa chengkawl, thingthupui, ba-ne, engkim mai Ngopa lam thil te hi tui an ti em em bik, an sawi nin theih loh khua a ni. Kapa kum 90 mi nen ka nu damlaia hlim taka an inlemna hmun kan pan chuh – kapa rilru tur ka hrethiam. An inneih Jubili pawh khan Ngopa atanga an thiante  lokal zing ami, kapa thianpa leh sipai tanpui,  an vanglai a kanu  rimpuitu ngei mai Upa Engliana’n thu a rawn sawi te leh kapa thusawi te kha ka hrechhuak uaih uaih mai. Mum & Dad In Love @ Diamond Wedding Anniversary

Ka nu leh pa te kum 50 leh 60 inneih chama an thlalak ka’n tar bawk ang e.

mum & Dad @ Their 50th & 60th Anniversary

Kan pi leh pute ve ve thla pawh kan dah law law te’ng  
Grand-paretns fr dad & mum's side

Ngopa ah hian 1966 khan school ka kai ve,Hotupa Tlanga khan veiziak  a phal loh avangin, kei ka lo veikhawr laklawh si a hrehawm ka ti thin hle. Chhunhawlh laiin field-ah sertawk ball kan pet thin  nuam kan ti ve em em. School banah Tuila ah thiante nen Vawmbal-li ah tuichengin kan kal fo mai. Chakai te kan khawrh a kapu tan sairil tlawn hnih ka hawn thin te kha ka hrechhuak. Hmunnghak lamah Lura hovin lawi kan han khalh fo bawk – Bemi chunga chuan kha kan hreh, a tar tawh si, a zang a hriam avangin  chuan a nuamlo kan ti vek mai, Puki kha a tuai mum nalh  avangin a chung chuan a nuam thung. Tumkhat chu Hmunnghak kan thlen hma-in lawi ho kha an rawn thlanchhe haw hum hum maia, a hnunglam ami kha Keite-in a tai a lo hamthlak sak chu lo niin, Sakei hahum te kha daihnai han pelh hi chuan a ri dur dur mai thin, an rem ta ni maw?

1972 nipui chawlh laiin kapu damlo kanin Pa Thangzama nen kapu kan han kan-a, Pawlrang chhuk EGS road zim em em mai, Jeep kawi zawh lohna te pawh a awm nual mai, thing balcony rawp  chhe deuh ah chuan keini Jeep bracket-a in uaitang ho chu kan zuang thla sap sap zel. Kapu kha ailaidum chiah khan an enkawla a bet rei hle, a thla a thla a bet hnathawk theilo-in. Kapu dam tha silo kani Vanchhungi leh Raltawni te chiah khan Lungding rama kapu lo chu an thlo, kanite hlo kan thlawh pui ve lawp lawp kha Ngopa-a hlo ka thlawh ve chhun chu ani ta mai.

1973 khan Tuila kam phaizau kapu (Upa Vanthuama)  leilet buh chhek puiin Ngopa ah ka zin leh. Kapu lawichal Pathenga la damlai kha ania, a tar deuh tawh nain buh tin 6 te kan phurh tira Tuila atangin kan khalh chho thin. Zanah Lura te Zosiama te leh thian dang te nen Ngaisangi d/o Chuaukunga (Upa Dawngzuala thiannu) kan rima, tingtang khawlaia perh pahin “Aw lunglen curfew karah hian” tih hla leh hladang tamtak kal paha kan sak thin te khan lung ava tileng ve le. Khang hunlaia Tingtang perh thiam ho kha chuan “Chengkawl bial an hip ngailo” tih beat kha an hmang deuh ngei ngei Calypso tih vel erawh V. Hmuna te ho khan a hnulamah an rawn thiam chho.

Zan dangah nula tui kan chawi pui – tuium an phur lo Jerrycan hnam a khirin nula te’n an phurh thin laiin mipa in ko-in kan pu thung. Kapu bathlara paho phawk deuh Pa Lungkhama leh adangte khan ka tuichawi pui apiang kha ” Duha chhuah miah suh aw …” tiin min fiama an nui dar dar thin. Biaksiami (tleirawl) zaithiam kan farnu tui ka chawipui tuma Salvation biakin bul favai paihnaa min nek thlatu kha tutak ni maw?

1973 Mas Ngopa-ah hman tum em em a ka awm laiin ka lung a leng thut maia  December ni 23-ah Changzawl ka pan, kani pasal Pu Biakthanga (Chamteii pa) te inah riak pheiin, a tuk-ah Tuivawl kanin chho ulh tawk kal hnu-ah Sihfa hma takah ka thleng. Sipai Captain kha saptawng inti thiam takin chuan ka dil a, Sihfa atangin Army Jeep hnung Jerrycan petrol an paina bulah thu-in Keifang-ah min dah, motor min chanpui. Zero Point atangin truck hnungah Mas hla sa thla dup dup-in urlawk zan chuan Aizawl ka thleng.

Ka lunglen lutuk ka haw chhan lah chu keini ai senior kamding-in kan telve rual lohin a lo hauh khur mai si – Aw Ngopa-ah khan la cham hle hle ila ka tih te kha tun Hawrunpui hian a lo thar chuaih chuaih mai nia le.

Hawrunpui hmang turin mi sang chuangin ni 16/1/2013 khan Ngopa kan pan khawm chur chur mai le.

Hawrunpui 2-13 Sticker

Hetiang hian Hawrunpui 2013 chu kan hmang –

16/1/2013 ah kawtchhuahah nula leh tlangval te’n min lo hmuak, zanriah eikhamah Inlawmna hun hlimawm tak kan hmang.

Ngopa YMA zaipawl an thiam hle.
YMA Zaipawl Inlawm ZanNgopa nula Zomuanpuii leh midangte an zai bawk. Saipaite te’n min tihlim hle.
Sipaite

Hawrunpui denchhen in Monument cum Watch Tower bialtu MLA leh Minister Pu H. Rohlunan a hawng.

Monument Tower 

Lalzidinga Ngopa LalMonument cum Watch Tower pawn leh chhungah granite plate ah kan hmangaih kan nghilhloh  te hriatrengna kan tar. Rs 50K, 20K, 10K leh 0.5K man te ani. Mi 44 in kan tar, la tar belh zel tum an tam mai. Bsi2

Chhungte leh thiante in hrang hranga tukthuan kan eikhamah muangmarin Chhung Inkhawm hun kan hmang.Thusawi tawi, tawngtai rual, zai leh fiamthu hun te’n a zui. Tuari leh Suna te an che, Naemi leh midangte an zai tha hle.    
YMA Zaipawl

  1. Chhung Inkhawm @ SelfNgopa khaw thlalak hlui

Chawhnu ah Sports Complex football ground puitling  ah Ngopa thalai an inkhel, martial arts an entir bawk. Chumi zawh chuan Ngopa United (keini ho) leh Ngopa City te’n ball pet kan hlimpui hle

Ngopa United Ball Pet ThiamNgopa City Ball Pet ThiamNgopa United Dr Dawnga & Self

Hawng hote’n hmun hran hranah zanriah kan kil leh hnu-ah Thalai Zan hman ani. Hei zet chu Active Sound line array kimchang nen Concert turu ber ani tawp mai. Lemchan tawi pawh a hmunawm aimahin a bengvar thlak. Mahni intodelh ram, khua, chhungkua, mimal angin a pawimawh thu leh thalaite mahni tana chakai khawrh ngar ngar tura fuihna thu ka sawi ve. Zanlai thleng thelhin thalai an lam mup mup laiin mahni khaw zai ngeia Lengkhawm ho pawh Pathian thu leh zaia inpawlna hun tha tak an lo hmang bawk.   Jess BeyondDrama Nula Rim titiNgopa kum 80 tlinna zing ni (18/1/2013) a lo chhuak  Field-ah mipui sang tel kan pungkhawm. Jubili Lawmna inkhawm hlimawm tak zai fiamthu leh thusawi tawi te kan ngaihthla.

Usher pawh an nalh hlawm e.

Usher Malsawmi

Jubili lawm ni hian Mizo inchei a nalh deuh deuh ho Pi Lalthai’n lawmman a pe hlawm.
Mizo inchei

Thlurhnih zai a rawn ri kan chai kan lam kan nui ri hawk hawk ava nuam em.Mizo inchei pholang thei ang bera inchei tur tih anih avangin keipawh ka nalh ve hle.Chai @ Thlurhnih Zai

Lam thiam Laia leh Chamteii

Laia leh Chami te an han lama Pu Kapsanga’n a vanglai a ngai Thlurhnih hla a rawn hril – chheiraw mipui kan tho hut maia, kan chai kan chheih kan khek PC Vanlalnghaki a Hallelui taksa chetna nen a rawn chheih. Nuam kan ti kan hlim mange Hawrunpui chu.

Chami

Ruai buatsaih nghah pahin Airshow (Drone) neih ani a thlawk a leu a vir a tum a thlawkchhuak leh Ngopa chungah a kual video in thla a la vek bawk, a hmuhnawm ngei mai.

 Ngopa town view from toyplane

Ruai mi 7000 chuangin kan theh. Sial 3 bawng 2 vawk 17 leh adangte kan talh. Fatu hoin belchhun-ah chhum chawp zelin, chaw sa vat vat mipui min eitir vek kan puar kan fan kan tlai. Sa bel sawm zet a la bang,

Ruai Mipui

Khawvel ram hrang hrang ka fang ve tawh an ei-in tuihnai ka tem nasa, he Hawrunpuia sesa anga tui ka tih hi ka la ei ngailo hrim hrim. Ka puar ka fan, tuitilo an awmlo. Zanah Hotupa Dawla inah thianho-in kan thlirlet ,nawn kan chak, kan sep rawtui. kan tu kan fa Ngopa la hmu ngailo kalho lah in nuam an ti.

Ruai Paris

Tlaiah chhungte leh mi kan ral kual hnu-in Inthlahna hun kan hmang, zai leh lamin zanlai pel thakin thalai leh pavalai ho Inthlah zanah an lam tawp theilo ani ber. In thlah zanah Ngopa Hawrunpui Special buletin Information & Publicity sub-comtt. Buatsaih ‘NGOPA LEE AVA NUAM BERR’ tih chu Pu Vanzamluaia NHOC Secretary Aizawl in a pho chhuak. Hemi hnu hian  Jess Beyond te’n Ngopa an Rock tir ani ber mai. Nuam kava ti berrr tih leh Ngopa leee tih a ri zing hle.

Jess Beyond

ConertHreh tak leh la thlahlel tak chungin ni 19/1/2013 chuan Hawrunpui hlimawm lunglen thlak tak kan hman zawhah kan hawng leh ta dial mai. A zawngchhang tlakin ava lunglen thlak em. An luang a leng ve ngei ang.

Tower leh Banner

 

51 thoughts on “NGOPA HAWRUNPUI 2013

    • Khatih lai kha chuan 50KW vel Tuila Small Hydro chauh kha an la ring alawm. Tunah chuan 132KV Sub-station SDO in a thut chilh.Cable TV pawh Local Channel pechhuak pahnih an awm tawh. In sang khua kan inchhal ve ta der mai

  1. Ngopa ka xpi ve chhun cu..thian 2/3 vel phai wm pui thn ka nei ve hlawma, an hlimthei fu a,fiamthu an dawl in an bul awm a nuam in kan inngaina fu thn.

  2. Tunah ka chhiar ve hman chiah a, chhiar a mahlain en a manhla hle mai. Hetiang thil ropui in tithei hi in fakawm hle.

    • U Biak kapa kum 90 mi kan hruai HAW zingah a upa ber, kan hlim kan lawm kan in chibai nasa. Ngopa lengkhawm zai video in kan lo la tello erawh a pawi, sharing hun tha tak Dr PC Biaksiama te PC Vanlalnghaki te pawhin an nei mawle.

  3. La hre lo tan pawha ninawm lo tur, kimchang thawkhat si a Hawrunpui chanchin leh thlalak min hlui thei hi i fakawm e. FB Group dangah pawh dah theih ni se a va duhawm ve.

  4. Hmuhnawn khawp mai . Ka FB thiante , ka sava veh pui thinte leh kan sa ram chhuahnate pawh a lang e. Lung a va ti leng deuh ve aw . 50 plus Football star ho hian ka mual hman thiamah khan in lo hel nuai a ni maw . Document hlu tak a nih hi le.

  5. Inneih siakna leh rualelna khawvelah hah leh chau leh pik reng rengin hringnun hi kan hmang kumtluan thin a. Kan taksa leh rilru hian hahchawlh a in ‘refresh’ a mamawh tih kan hre ngai lo. Mahse, hnam fing zawkte chuan kar tluana hna an thawh zawh hnuahte emaw, kum khatah vawi khatte intihhlimna hun an insiam thin. Keini pawh mihring ve tho kan nih avangin chutiang chu kan nun hian a mawmawh a, kan taksa hian a chakin a tuihal a ni. Amaherawhchu, a nachang kan hre ve lo va, engtia hun hman tur nge tih pawh kan ngaihtuah ngai lo.

    Thenrual hluite leh chhung lehkhatte nena tlang khata inhmuhkhawma hun hlimawm hman a nawmzia leh a hlutzia hi tun Ngopa hawrunpuiah hian hmuchhuak chiang hle in ka inhria. Ngopa hawrunpui chhim tu, a khaw hmun nghak te, Aizawl leh hmun dang atanga kal zawng zawngte kha he zawhna, “Hawrunpui chu nuam i tiin zawngchhang tlak i ti em?” tih hi zawt ta vek ila, ‘nuam lo’ ti a min chhang hi an awm ka ring lo. Chuvang chuan Ngopa khawchhuak inzawmkhawm pawl leh Ngopa khawtlang ten hawrunpui an siam hi a hautakna leh a buaithlakna lam ngaihtuah lo va, a nawmna leh dam hlutzia ngaihtuah zawk chunga chhunzawm zel tlak niin ka hria.NHOC hian hawrunpui hi annual event a chantir in, kumtin huaihawt thei se la, carnival type deuhvin programme danglam deuhte pawh han siam se a fuh ngawtin ka ring.

    Hetianga an kalpui thei ngat a nih chuan Mizorama khaw khat chhuak inzawmkhawm pawl dangte pawh hian an entawn anga, an ti ve sup sup in ka ring. Tunah hian Ngopa hawrunpui thawm hria, Sialsuk khua leh khaw dangte pawhin an chak ve a, ti ve thei tak ang maw…?? Silver, golden, diamond jubili leh centenary lawm intihhmuh hnam kha kan ni tlat a.

    • Annual Event hi tithei ngat ila chuh – Ngopa ah hian Hotel te cottage te a ding sup mai ang mawle. Thlurhnih/Chalmar zai leh chai leh lamte Ngopa lee bik te Rock show te leh Mizo ruaitheh dan ngei nena han chawma hawp bawk tur chuan Event dang a tamlo khawvel-ah. Lengteng explore duh tan chance tha Tuivai rafting duh tan chuti bawk. International-ah han market ila sum senso chu a intum mai nilo in hlawkna a awm ngei ka ring asin. Tourist ho guide tur hian Ngopa thalai an tha tawk reng.

    • Mi 1386 motor chi hrang hrang 214 in kan haw khawm. German leh Myanmar atang te Zoram khawvel hmuntin atangin kan hawng khawm chu chibai vangin kutzia a mam tep mawle

  6. tihthep tum chu puar xual xel tawhse tihna ni in ka hria.puar ltk puak keh ta ee tih thawm hriat tur aem chuang hlei nem troo.choi belh awwwwwmlo

    • NWC Ngopa Welfare Committee hi rambuai hlim khawkhawm lai vela Aizawl vela pem hum hum lai khan din a ni a. Pem tharte ngaihsak leh an inbenbel theih nan te hmala in zirna leh eizawnna kawngte an lo in kawhhmuh thin. Urban migration lah a pung zela. Ngopa khuaa la awm te leh NWC te hi kawng hrang hrangah kan intawiawm tha em em.

      Ngopa khaw ngaih leh zin/tlawh chak a reh lo. Chutia khawvel hmun hrang hranga awmte chuan a huhovin mahni khua ngeiah hun inang ah i haw khawm ang u tiin – HAWRUNPUI hi kan lo rawt chhuak ta a ni.

      A hma kum hnih dawnah kan er lawka – ran lu kim talh kan duh vawk vulh thei thei hnenah Vawk no kan pe. Chutiangin Ngopaa la awmten an in leh a velte an lo chei tha ve bawk. Sanitation lamah hma kan sawn phah hle bawk.

      Chutiangin kapa ngei pawhin a in a seilenna te pawh zahpuiawm a tih avangin sak that te a er phah hial. Tute pawh kan phur tlang sum pawh hemi hun atan hian kan khawl tang tang hlawm a ni.

      Ngopa khawtlang hmasawn nan leh he hun hriatreng nan hian Tourists te tlawh tlak Structure WATCH TOWER te siamin khawthlir nan leh Fianrial tawngtai duh tan Tower sang tak kan sa. Munich (München) Olympic Tower tluklo mahse kan phak tawkah kan hlut hle mai. Thalai hovin an thiam hrang hrang an show. Thlalak hlui exhibition te pawh a awm bawk.

      Pathian Thu lama inkawm khawmna te Ngopa thluk dan ngeia zaiho bakah Workshop / Seminar Type te awm bawkin Free Rock Concert te nen thleng mai beih a ni.

      Hetiang Event hi khawdang pawhin ti ve sela a that ngawt ka ring. Mahni khua pem san tawha han hawn ho chu nuam kan ti hle. Foreign atang lokal leh state dang atanga lokal tiamin mi 1500 dawn kan hawng a ni he HAWRUNPUI ah hian.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s