ZO-AWI LELTE NGAISANGTUTE KAM CHHUAK

1. Vanlalruati tana thu kam hnihkhat:

Kan naupan lai chuan Mizo zaithiam lar te hi an han lar mai mai thei khawp a, tunlai ang hian an hmel hmuh theih ni ngawt hek lo, an zai ri atang ringawt te khan an hmel awmdan tur kan suangtuah mai thin kha a ni a. Chung zinga chungnung ber pawl, Mizonuah chuan nu vantlang chung hret, hmeltha tak, pian chhe lo tak nia rin theih tur ang ting chuan Pi Ruati hian a thlalak tlemte a dah tel ve thin a, chu chu kan suangtuahna nena a hmel kan hmuh theihna awmchhun chu a ni mai a. A zaithiam zia te, a aw nalh zia te chu sawi vak turin kan la hrethiam chiah lo a ni.

Hun a lo inher zel a, kan lo tleirawl chhoh meuh chuan Pi Ruati zaithiam zia leh a music nalh dangdai bik zia te kha kan hrethiam chho ve ta zel a “Zoawi Lelte“ album ngat phei chu Sap ram kutchhuak tih a hriat ngawih ngawih a, kan ngaithla kham ngai lo kha a ni a. Kha album atang khan Pi Ruati zaithiam zia hi a chiang lehzualin ka hre thin. Tun thlengin ka la ngaithla fo thin. A bik takin “Lungduh Di then chu“ tih hla phei kha chu vawiin thlenga ka hla duh ber te zinga mi a la ni fan a, ka ngaihthlak apiang hian ka hnuk a ulh nawn fo thin. Amah Pi Ruati irawm chhuak ngei tih ka han hriat ngat phei hi chuan zaithiam satliah ni lo, a hla phuah thiamzia leh a ril zia hi ka ngaihtuah nawn fo thin. He hla kher hi chu “Vanlalruati Masterpiece“ah ka dah lo thei lo. A chhan chu a Mizo tawng kauchheh rem fuh dan leh a tawng un hman mawizia hi ril raih raih tak a ni.

Engpawhnise, kan hringnun hi kan thunun theih leh kan kuta awm a ni lo va, siamtun a duh anga a thunun tura a din a nih miau avangin hnah hlui tilh hun a awm a, hnah tharin a rawn thlak hun a awm ang hian engkim tan hian hun ruat a nih miau avangin kan huntawng hi a nihna anga kan pawm thiam a tul a. Chumi pawm thiam a piang chu mi vannei ber an lo ni mai thin. Engpawhnise, Pi Ruati a dam that thuai thuai a, Zofate min awih leh thuai theih nan duhsakna ka hlan e.
By: Puia Zorinpuiapa Switzerland

2. ‘Zai thiam’ tih mai hian a hril zo lo va, ngaithlatute lung hi a lo awi em em a, kan hahchawl tak meuh thin a ni. Lunglen kaitho zawng te, mithi ngaite tahtir zawng te, vanram min tingai zawng te, chantawka lawm thei zawng te-in rilruah nasa takin Ruati hla sak hian a thawk thin a ni. Thlaraua Pathian pawl thei khawpin min zaitir tel ve thei. Hnam rethei leh hausa ber berte pawh, thusawi thiamte hian min chawk danglam nasa thei zawk.

Chutianga min chawk danglam thei zaithiam Vanlalruati hian Mizote min va ‘khawih’ nasa em! Pathian thilpek dawng a ni, zir thiam belh phei chu a nei mahna. Hla min phuahtir pakhat chu ‘Ka Di Chhawrthlapui’ tih a ni a, Radio-ah pawh an la kawl tha. Hla dang, ani sak vanga hriat hlawha ka ngaihte chu –
Tho la, ding ta che; Ram riangte hi kan kurpui, hmatiang sawn kan tulpui; Berampu tlawm tak leh Chhinlung chhuak Zofa lengte u (Ram hi kan siam).
Key-board chelek hma a ni a, thangtharten ‘thing’ min tihsak zo ta em ni ka ti. Amah phuahna ‘Zo-awi Lelte, ti mai a …’ tih kha thiante phuah a ni a, tunah hian kei chuan “Zo-awi Lelte, ti mai chuan I chul lo’ng e” ka ti fan a ni. Hun hluite kha an thar leh thin dawn a ni. ‘Vive la chanteuse’.
V.Thangzama

3. Pi Ruat, Zoawi Lelte tih hial khawpa Zoram khawvel dengchhuaktu i nihna hi kan ngaihlu a, i hun hmalamte kan thlirin, chawimawi i phu kan ti. I tawrhnaah hian kan tuarpui che a, i hming hi a dai tawh ngai lo ang.
– Zothana, Dinga, Samuel-a, ZS Cable Network, Lunglei

4. Ka Ni Ruati’n cancer a vei tih ka hriat tirh chuan a mi den dan a dang hle.A natna ang vei tam tak ka lo hre tawh thin,mahse enga ti nge ani ber kher tiin ka ngaithiamlo hle a,mahse a damlo chung pawha hlim taka a nun a la hmang thei hi Pathian awmpuina nasa tak a dawn vang ani ka ti lo thei lo. Ka Ni hi ka ngaisang a,Mizo hmeichhe zaithiam zawng zawng zingah thiam ka ti ber bawk a,thangthar zaimi ten amah atang zir tur tam tak an nei a,a aw mawi tak hi a lei taksa lo ral hnuah pawh Zofate kan la awm chhung chu a dai tawh dawn lo.Zofate tana hnam ro hlu a lo ni e.
A vahnu Dr.Lalrinkimi Khiangte d/o George V Khiangte(L) Chaltlang

5. U Ruati tan chuan engnge tangkaina ka neih ve ang aw? Ka tangkaina mual a awm chuan min rawn hrilh ve teh u. A Nite ticket lei te kha chu sawi ngai lovah dah ta ila. A tan engemaw tal tih ve ka duh asin.
P.L. Liandinga

6. U Ruati vanglai kha chuan kan va han ngaisang thin take em aw. Zirtawp zan radio hla thlan ah khan U Ruati a zai loh a awm ngai mang lova. Theater Hall-a concert an neih kha ka hmaih ngai mang lo a ni. Kan naupan leh zual deuh lai phei chuan kan inkhualtelem hi U Ruati nih hi kan inchuh nasa thin. A zai thiam mai bakah a pian nalh em em leh a hmel te kha tha kan ti thei lutuk. Tuna hetia hun khirh tak a lo tawng hi kan khawngaih em em maia, chutih rualin chhel leh huaisen tak maia a natna a hmachhawn ani tih a interview ka en khan, ka chhuang em em a ka ngaihsan zual phah sauh a ni. A vanglai hunte ka fate ka hrilh fo thin. Zo-awi Lelte hi chul mai tur chuan ka phal thei lo, a chul dawn lo, a hlate hian Zofate min la awi dawn chauh a ni.
Vandingpuii Dinthar Veng

Thu a sawi chhuak ve kher lo Ruati ngaisangtute chuan – A Memorial Zofate’n kan hriatreng theihna tur ngaihtuahin a thenin hma an la meka. Chutih laiin Zofate min kalsan a cham hmasa ber hian Vanlalruati tribute Concert neih tum mek a ni bawk.

Zofate min kalsan hmaa a Album hnuhnung ber pawh May ni 5, 2011 hian release ani bawk dawn.

Ka sawi ve duh chu – Ruati nen hian school kan kal ho, zaithiam ka ti, ka ngaisang, ka ngaihsan zualna chu; Zofate ram a zauh nasa em em leh a zai hian kan in-unauna a chawi kang dawrh mai hi a ni. I Chul Tur Hi (Lyrics) hian belhchian a dawl mange –

I Chul Tur Hi (Zo-awi Lelte)

1. Van hnuai thang hming tha chuang,
Khuavel thang chhuak a’n maw,
I lo pian hring mi hei zawng zing a’n
Khua-nu chawi hming lian tha rualkhumin

Engitn ngai ang maw Zofa leng zawng te’n?
Zo awi lel-te ti maia I chul tur hi.

2. Kan ngai thiam thei ‘nem le,
I zun phur leng zawng te’n;
Ti maia khiangawih hi kan tiam ‘nem,
Mahse auh kir rual I chang si lo.

3. I dawn kim lo em ni
Zofate’n kan chan hi?
I tello chuan e kan Zoram hian,
Kal siam relin ka ring thei lo.

4. “Awle dam takin le”
Tiin i rual duhten;
Kan thlah nang che rihsang mual chu liam la,
Hlimten Lalpa fakin zai nang che.

Vanlalruati hi lungleng thei tak a ni – Ka Di Chhawrthlapui tih pawh hi Upa V. Thangzama hi a phuah tir kher kher a ni. A hla thu (Lyrics) lo tarlang ila –

KA DI CHHAWRTHLAPUI 

Zanin chu ka Di chhaktiang Chhawrthlapui,
Sakhmelah ka thlang ber che,
Min tum ve che maw lo her hnai che maw?
Tlaivarin ka nghak ang che.

Ka Di Chhawrthlapui I no kher mange,
Lei thim en la buan ang che,
Lenlai chena leng zawng te min hnem la;
Liam lul suh la ding reng rawh.

Theih chang teh sela lamtluang chhui dunin,
Suihlung ka rualpui tur che,
Mahse rauthla leng lamtluang em’ i zawh?
Lungmawl in ka ngaithiam lo.

Ka Di Chhawrthlapui hleinga chu zuan la,
Lo let leh la ka tawnah,
Sakhming ko che in – ‘Zanlalnu’ tiin;
Tuan rel lo la cham reng rawh.


Changkhatna ah hian – He khawvel Zofate zingah na na na hi chuan I hming hi a va han thang tha nasa em. I zaithiam zia hi hre lo an awm lo ang tih hial ani, tiin bul an tan a. Chumai duh tawk lovin khawvel deng chhuakin I hming hi an thang ania, Zofate I tihmingtha  tiin.

Zofa zaithiam te’n Ruati an thlahna video hi lo en ve teh.

Advertisements

12 thoughts on “ZO-AWI LELTE NGAISANGTUTE KAM CHHUAK

  1. A chang tawp ber hi a hla thu siamtu Zirsangzela nupui Lalhungchhungi Pachuau phalna in heti hian kan siam danglam
    “Awle dam takin le”
    Tiin i rual duhten
    Kan thlah nang che rihsang mual chu liam la
    Hlimten Lalpa fakin zai nang che

    • Zoawi Lelte vuina a sak angin ka correct e. A hla thu original duhtan chang 4-na chu hetah hian dah mai ang –

      “Awle damtakin le”
      Tiin I rual duhte’n;
      Kan thlah na’ng che khiangawi mual chu liam la,
      Fanau chawiin kumtluang dam reng rawh.

  2. E khai a, tha ka ti hle mai. Mi hlawhtlingte hian thinlung thar leh ngaihtuahna tha tak tak min siam thin. Hetiang ang dinhmun thleng tur hian taimak, tuarchhel, tihhram hramna, insumtheihna leh a dangte amahah a awm teuh ang le……

  3. pi vanlalruati hi mizo nu-ah chuan ka ngaihsan ber pawl ania kan vanglai rualhluite nen lungleng fahrana khawvel dang a awmve tih pawh ngaihtuah miahlova zoramngeia chhawrthlapui enghnuaia tleitirah tleitiri zalengah lengdawni keikatanlungrun tihhla kan han ngaithla a asatu lah in a thiamsi pi vanlalruati hmingsawi ringawt pawhin zoram nu leh pa te ngaihtuahna hian nunhlui liam tawh hnu ngaihtuahna a kaitho leh thin famdairial changin zamualliam mahse lang a chuai dawn lo tumhara avas hamesa amarrahega heleia hlim taka enkawltu lalpa chuan chatuanin A angchhungah thlamuangtakin lo dahse tih hi ka duhsakna ka hlan hnuhnung ber nirawh se

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s